-Almmuhus-
-Almmuhus-
OĐĐASATElle (22) vásihii sámevaši Romssas

Elle (22) vásihii sámevaši Romssas

-

-

 Son bargá justte fal dainna ahte eastadit rasismma ja sámevaši Romssas, muhto mannan vahkkoloahpa vásihii cielaheami su duogáža dihte.

Mannan lávvordaga vásiheigga guokte nuorra nieidda dan maid sápmelaš dávjá ballá. Elle Márgget Nystad ja Anne Ragnhild Porsanger cielahuvvuiga gávpogis go lei gákti badjelis.

– Leigga guokte nuorra gándda geat čuorvvuiga ja vácciiga munno maŋis. Soai čuorvvuiga «Samedamer, samedamer løft opp kofta og vis samedamerumpe», čállá Elle Márgget Nystad Instagram story:s gaskavahkku.

Viidáset čállá Nystad Instagram story:s ahte soai eaba dahkan diehtin gánddaguoktá, muhto go dolliiga su olbmá de šattaiga bivdit gánddaid heaitit cielaheamis sudno. Guokte eará olbmo leigga vázziime sudno ovddabeale ja bođiiga veahkkin nieiddaguktui.

– Njeallje olbmo ja njeallje jiena dárbbašuvvojedje bissehit gánddaid ja oažžut sudno eret. Ii lean doarvái oktii gieldit, čállá Nystad story:s. 

Ožžon olu fuomášumi

Sudno vásáhus lea ožžon olu mediafuomášeami maŋimuš beivviid. NRK Tromsii lea Elle Nystad dadjan ahte lea ilus ahte lei son guhte vásihii dán, iige muhtin gii ii leat oadjebas iežas sámi identitehtain.

Nystad bargá prošeaktajođiheaddjin RomsaDál prošeavttas, mii galgá eastadit sámevaši Romssas ja loktet gelbbolašvuođa sámiid birra.

Loga maid:
Gealbo­loktemin eastada sáme­vaši 

– Dát vásáhus movttiidahttá mu áŋgiruššat vel eambbo, ja lassin lea nannen ulbmila manne prošeakta lea nu dehálaš. Mii dárbbašat guottuidnuppástuhttima sámi álbmogii, dadjá Elle Márgget Nystad NRK Tromsii.

-Almmuhus-