-Almmuhus-
OĐĐASAT– Eai leat muinna váldán oktavuođa

– Eai leat muinna váldán oktavuođa

-

-

Finnmárkku fylkkagieldda váldolávdegotti jođiheaddji imaštallá go sámi festiválat eai leat suinna váldán oktavuođa jus leat duhtameahttumat juolludemiiguin maid fylkkagielda juolluda.

Lávvordaga Ávviris muitalii Kárášjoga festivála jođiheaddji, Kenneth Eliassen, go Finnmárkku fylkkasuohkan lea unnidan beliin doarjaga sin festiválii.

Ávvir čálii maid ahte seammás go Riddu Riđđu ja Márkomeannu ožžot badjel 500 000 ruvnno ja 100 000 ruvnno sturrosaš doarjagiid Romssa fylkkasuohkanis, de šaddet Finnmárkkus sámi festiválat duhtat 20 000 ruvdnosaš doarjagiidda.

Vel Gáŋgaviikka kulturdoaluide ožžot eambbo doarjaga go eará sámi festiválat Finnmárkkus dahket.

 

Eai váidagat

Dál dadjá Finnmárkku Fylkadikki Kultuvra-, johtolat- ja álbmotdearvvašvuođa váldolávdegotti jođiheaddji, Geir Ove Bakken (Bargiidbellodat), ahte sii eai leat gullan váidagiid ovdal ahte eai leat duhtavaččat doarjagiin.

– Mun in dieđe sihkkarit, muhto in goit muitte ahte muinna lea oktage sámi festivála ovddasteaddji váldán oktavuođa hupmat doarjagiid birra maid mii juolludit sidjiide.

– In leat gal in váidagiid ge ožžon daidda juolludemiide, lohká Bakken.

 

Lunddolaš oktavuohta

Bakken lohká ahte su mielas gal livččii lunddolaš ahte festiválaid ovddasteaddjit váldet oktavuođa ja čilgejit sutnje dili mii sis lea festiválain.

– Mun dárbbašan goit dieđuid daid festiválaid birra, muđui gal lea munnje váttis árvvoštallat dárbbuid.

– Munnje dieđus maid lea váttis ná dadjat juste manin eai oaččo doarjagii, dahje manin eai oaččo nu olu doarjagiid. Dan maid sáhtán lohkat lea ahte sámi birrasis leat olu gelddolaš artisttat, ja lea juoga hui gelddolaš mii orru dáhpáhuvvame doppe.

– Livččii lunddolaš mu mielas ahte sii muinna váldet oktavuođa. Bakken.

 

Vuoruhit sámevuođa

Bakken maid lohká ahte sii áigot eambbo vuoruhit sámevuođa ja dan oažžut eambbo oidnosii.

Áigubehtet go eambbo ruđa álgit juolludit nu go sámi festiválaide?

– Na dan gal in sáhte dás lohpidit, lohká son.

Go Ávvira mielbargi jearrá movt áigot vuoruhit, nu go sámi festiválaid, jus eai juollut eambbo doarjagiid, de dasa ii leat Bakkenis šat vástádus.

-Almmuhus-