Johan Vasara galgá láidestit FeFo neahttakonferánssa Finnmárkku boahtteáiggi birra.
«Mo mii galgat eallit ja hukset boahtteáiggi Finnmárkkus?» lea fáddán FeFo neahttakonferánssas mii ihttin lágiduvvo Guovdageainnus.
Dat konferánsa lea heivehuvvon nu ahte dan sáhttá čuovvut neahta bokte nuvttá.
FeFo leat čohkken Finnmárkku sátnejođiheaddjiid ságastallamii. Sámediggi lea maid mielde, Norgga kveanalihttu, Finnmárkku fylkkagielda, ja diehttelasat FeFo.
Fáddá lea movt galget ovttas eallit ja hukset Finnmárkku boahtteáiggi.
Ieža leat gohčodan dan neahttakonferánssa beavdeságastallamin.
Guovdageainnu bargiidbellodaga suohkanstivraáirras Johan Vasara galgá ge jođihit ságastallama.
