UiT – Norgga árktalaš universitehta lea nammadan iežaset ođđa dutkanskiippa «Buks-Berret» mearrasápmelačča nissona Beret Paulusdatter Dypvand maŋis gean gohčodedje Buksa-Birehin.
Beret Johanna Paulsdatter Dypvand riegádii 1794:s ja jámii 1868:s. Son lei Ufuohtás eret, lei heavsmánni ja hovdii iežas bargoveaga Luofuohtaguolásteamis. Lei oalle erenoamáš nisu go son áimmahušai sihke eanadoalu ja gávppi, ja lei maid guovžžabivdi, njuovvi ja jorttamovra. Son lei oaidnil ja máhtii maid bissehit dálkki. Eará sániiguin, nisu gii ánssáša oažžut iežas nama čadnot dutkan- ja oahpahusa skiipii.
– Min mielas lei hui heivvolaš nammadit ođđa skiippa dan mearrasámi nissona maŋis. Mu áhkku lei guolásteaddjieamit ja áddjá nammadii fatnasa su maŋis. Sáhttá lohkat mii leat válljen čuovvut buori árbevirolaš riddoguovlovieru, lohka UiT dutkan- ja ovdánahttinprorektor Camilla Brekke preassadieđáhusas.
