Mediabearráigeahčču lea meannudan 30 iešguđetlágan drive-in-doalu ohcamuša dan rájes go eiseválddit ásahedje koronadoaimmaid njukčamánus. Eanaš ohcamušat gusket ealligova čájeheapmái.
– Vaikko olbmot čohkkájit iešguđet biillain, de orru leamen nu ahte olbmot dattetge dovdet oktavuođa nuppiiguin dán láhkai, lohká Mediabearráigeahču direktevra Mari Velsand.
Mediabearráigehččui leat boahtán drive-in-doaluid ohcamušaid lágidit ipmilbálvalusaid, konsearttaid, quisaid dahje diehtogilvu ja standup dahje artista mii guoimmuha olbmuid lávddis.
– Lea hui buorre go olbmot lágidit kulturvásáhusaid dorvvolaš guovllus dákkár váttis áiggis. Mii, Mediabearráigeahčus, váldet bures vuostá dakkárlágan doaluid. Mii geahččalat nu bures go sáhttit meannudit ohcamušaid nu jođánit go vejolaš, lohká Mediabearráigeahču direktevra Mari Velsand preassadieđáhusas.
Son muittuha ahte filmmain sáhttet leat ahkemearit ja daid galget filbmačájeheaddjit čuovvut.
Drive-in-doaluid jietna sáddejuvvo FM-fierpmádaga bokte biilarádioi. Dakkár sáddemii gáibiduvvo lohpi Mediabearráigeahčus ja frekveansalohpi Nasjonal kommunikasjonsmyndighet (Nkom).
Jus lea kinofilmmas sáhka, de ferte maid gielda addit lobi dasa lassin. Velsand muittuha ahte ii leat lohpi jiena sáddet FM-fierpmádaga almmá eiseválddiid addon lobi. Lohká sii gal áinnas veahkehit buohkaid ohcat jus háliidit dakkár doaluid lágidit.
