-Almmuhus-
-Almmuhus-
OĐĐASATDoallá go dálke­diida deaivása?

Doallá go dálke­diida deaivása?

-

-

Dakkár dálki go lea dán beaivvi ja beaivvi maŋŋel, bistá gitta mihcamáraide. Doallá go son dat deaivása? Mii jearrat dálkedieđiheaddjis.

Odne, mánnodaga miessemánu 16.beaivvi, lea boares ruosmmesbeaivi, ja mearkabeaivvis čuožžu ahte dalle nohká váldoguottet, ja máŋgga sajis urbi rahpasa dan beaivvi, ja dápmot borragoahtá vuokka.

Miessemánu 17.beaivvi lea Norgga nationálabeaivi ja ollu báikkiin davvin Norggas dieđihuvvo borgadálki, biegga ja čoaskkis.  

Borggat

Dan duođašta meteorologa Iris Hestnes Ávvirii.

– Juste dál lea borga ja čoaskkis, muhto dat luoitá dál beaivvi mielde ja dálki johtá lulásguvlui eret Finnmárkku duoddaris. Muhtin oavttit sáhttet leat gaskkohagaid, ja loaččes davádat, muhto eahkedis balve, lohká meteorologa Iris Hestnes.

Ávvir lea ožžon lobi almmuhit filmmaža man muhtin lohkki lea sádden duoddaris ja lea filbmejuvvon miessemánu 16. beaivvi, Finnmárkku duoddaris. Filbmejeaddji ii háliit almmuhit namas.

Miessemánu 17. beaivvi dálki

– Lea birrasii nulla gráda eanaš mihtidanstašuvnnain mat mis leat. Njuoskadálki rievdá borgan juste dál. Temperatuvra bistá sullii seamma dásis, muhto ihttin bivalda hui veahá. Eai šatta dan dihte alimus lieggalogut. Nuorta-Finnmárkku bealde leat veahá lieggagrádat, muhto borgaoavttit jotket ihttin, lohká Hestnes.

Miessemánu 17. beaivvi sávvet ollugat liehmu ja beaivvádaga, muhto dán jagi soaitá šaddat bures gárvodit Norgga nationálabeaivvi?

– Ihttin boahtá vuollegisdeatta mii olle Lulli-Romsii ja Davvi-Nordlándii. Dalle jorggiha biegga. Duoddaris ja sis-eatnamis jotket oavttit, muhto ii leat nu vearrái go rittus, lohká meteorologa.

Nuorta-Finnmárkkus orru šaddame buoremus dálki, vaikko ii leat liehmu ja beaivvádat.

– Girkonjárgga birrasis sáhttá buoremus dálki leat nationálabeaivvi. Doppe leat maid soames oavttit, muhto lea eanas fiertu. Ii okta ge báiki lea dálkevuoiti, dadjá Hestnes Ávvirii.

– Gaskavahkku firtegoahtá ja vuollegisdeatta sirdása eret. Nuorta-Finnmárkkus lea čavga biegga ja  oarjedavádat, muhto dat ložže eahkedis. Finnmárkku siseatnamiin firte ja biegga goikada bures, dadjá dálkediehtti.

Maid lohká meteorologa dálkediidda birra?

Ja de vel sámi dálkediida. Doallá go dat deaivása, ahte «dakkár dálki go lea dán beaivvi ja beaivvi maŋŋel, bistá gitta mihcamáraide»?

Meteorologa reaškkiha njálgát, ii ge loga sáhttit nu guhkás iskat dálkedieđu, muhto geahččala veahá jeđđet.

– Dálki rievdá veahá duorastaga, ja lea alladeatta mii olle Finnmárkui, muhto lea hui eahpesihkkaris diehtu movt šaddá viidáset. Vahkkoloahpa šaddá buoret dálki, ja dálki veahá jaskkoda. Oidnojit moadde vuollegisdeaddaga johtime lahkosiin ja lea váttis čuovvut daid, dadjá dálkedieđiheaddji, muhto sus lea goit okta sávaldat:

– Sávan ahte dálkediida ii doala deaivása ja ahte ii šatta dakkár dálki mii bistá mihcamáraide, lohká Iris Hestnes.

-Almmuhus-