Dálkki ja muohtauđasvára geažil giddejuvvojit luottat.
Dálkki oktavuođas lea Varsom sádden várrehusa oránša dásis mearkkašahtti muohtauđasváras Romssas ja Oarje-Finnmárkkus. Jus áiggut johtit olggos, de fertet čuovvut mielde makkár dálki doppe lea gosa leat vuolgime.
Romssas ja muhtin báikkiin Finnmárkkus leat juo ollu geainnut giddejuvvon.
– E6 Kvænangsfjellet badjel lea giddejuvvo mánnodateahkeda diibmu ovccis ja lea olles ija gitta dassážii go muohtauđasvárra lea nohkan, lohká davvi Luoddajohtolatguovddáža fágajoavkojođiheaddji Håvard Langmo preassadieđáhusas.
– Garra muohttin mielddisbuktá váttis vuodjindilálašvuođaid, ja máŋga geainnu sáhttet giddejuvvot oanehis áiggi ovddosguvlui muohtauđđasiid ja muohtauđasvára geažil, dadjá Langmo.
Son dáhttu guovllu johtaleddjiid leat áicilat, ja fuolahit ahte johtolatdilli lea nu buorre go vejolaš.
