Guhtta logádasoassi Davvi-Norgga nissoniin leat vásihan vealahuvvot maŋŋil go šadde eadnin.
Dásseárvo- ja vealahanáittardeaddji ođđa iskkus čájeha ahte 57 proseantta Davvi-Norgga nissoniin leat vásihan ahte bargoaddit vealahit sin áhpehisvuođa dahje váhnenvirgelobi oktavuođas.
Dušše Oslos eanet
Dát lohku lea badjelis go riikka gaskamearri, ja dušše Oslos dovdet nissonat iežaset eanet vealahuvvon go Davvi-Norggas.
– Áhpehisvuođavealaheapmi lea duođalaš dasa geasa dát guoská ja lea duođalaš servodahkii. Menddo olu bargoaddit rihkkot lága. Iskkus čájeha ahte mis lea ain olu bargu miehtá riikka. Logut čájehit ahte Davvi-Norggas leat olusat geat vásihit dákkár vealaheami, dadjá dásseárvo- ja vealahanáittardeaddji Sunniva Ørstavik.
Eai oaččo bargguid
Iskkus lea kárten vásihuvvon vealaheami ja heajos dáhpáhusaid mat láktasit áhpehisvuhtii dahje riegádahttinvirgelohpái. Dat čájeha ahte olusat vásihit dáhpáhusaid mat dásseárvolága mielde leat čielgasit lobiheamet. Ovdamearkka dihte vásihit nissonat ahte bargojearahallamis jerro lea go áhpeheapmi, eai oaččo bargguid go leat váhnenvirgelobis dahje eai árvvoštallo bálkášiehtadallamiin.
Dát lea dat vealahanmálle man birra áittardeaddji jerro eanemusat.
– Beaivválaččat riŋgejit olbmot midjiide ja muitalit dákkár vásáhusaid birra. Olu bargit vásihit ahte go mánáid ožžot de meannuduvvojit unohasat barggus ja ožžot heajut vejolašvuođaid. Nu ii sáhte leat. Galgá leat vejolaš ovttastit barggu ja bearašeallima, dadjá Ørstavik.
