Juovllaid áiggi ostet, ráhkadit ja láibot norgalaččat hirbmat olu, muhto olu borramuš báhcá borakeahttá ja loahpas bálkestuvvo. Váras iskkadeamis maid Norstat lea dahkan Opplysningskontoret for Meieriprodukter ovddas, muitala 40 proseanta álbmogis ahte sis lea heajos oamedovdu go bálkestit nu olu juovlaborramušaid.
Melk.no gulahallanneavvu lohká sivva borramušbálkumii, soaitá leat ahte olbmot gávppašit menddo olu, eaige dieđe maid galget bargat borramušbázahusaiguin – dahje vajálduhttet daid siskkimuš jiekŋaskáhpii.
– Juovlamánus erenoamážit, gánnáha bures plánet borramušgávppašeami. Dalle mii bovdet gussiid ja lea váttis rehkenastit man olu dárbbaša, mii láibut eanet gáhkkošlájaid go nagodat borrat ja geavahit eará borramušávdnasiid go muđui jagis, lohká Melk.no Stine Wickmann preassadieđáhusas.
Ná geahpedit borramušbálkuma
Olusat leat hárjánan ahte ii mihkkege galgga váilut juovllaid ja olusat soitet maid ballat ahte eai leat oastán doarvái borramuša.
– Berre rehkenastit doarvái juohke olbmui ja geavahit borramušbázahusaid. Čorge jiekŋaskábe ja bora buot bázahusaid ovdalgo eambbo oastát. Buorre ovdamearka lea risenrievdnasuohkat maid olusat borret beaivvi ovdal juovlaruohta, dan sáhttá maid borrat juovlaruohta, lohká Wickmann.
Ná sáhttá geahpedit borramušbálkuma:
Pláne borramušgávppašeami bures
Ále oastte eambbo go dárbbašat
Čorge jiekŋaskábe ovdalgo gávppašat
Máistte, havsse ja dárkkis borramuša ovdalgo bálkestat maidege
Borramuša govččat ja vurket galmmihanskábii gaskkal 2 gitta 4 grádii nu jođánit go vejolaš
Gánnáha borrat buot borramušbázahusaid.
