Ođđa sámi appa, Sámi synonymat, man Sikku Media lea ovdánahttán, lea dál almmuhuvvon sihke Android ja iOS telefuvnnaide.
Sámi synonymat applikašuvnna vuođđun lea Jovnna-Ánde Vest girji Sámi synonymat (2005). Applikašuvnnas lea vejolaš ohcat sihke váldosániid ja synonymaid. Ohcanvejolašvuohta dahká ahte lea álki gávdnat badjel 16 000 sáni gaskkas juste dan sáni man dárbbašat. Juohke sánis lea maid auto ráhkaduvvon web-čujuhus Álgu-diehtovuođđosiidui ja Neahttadigisániide. Dat rahpasit sierra browser-siiddus. Daid siidduid lea buorre geavahit lassin jus leat eahpesihkar sániid mearkkašumis.
– Applikašuvnnas leat muhtin oasit čállosis rievdaduvvon vai lea álkit ohcanfunkšuvnnain gávdnat. Ovdamearkka dihte lean čállán ođđasit váiv/i (-ves) nu ahte šaddá váivi – váivves. Lean maiddái čállán ođđasit sániid main lea deaddomearka. Ovdamearkka dihte veal´lát sáni lean čállán ná: veallát (veal´lát). Lean maid sirren sániid nu go eana(n)doalli vai šaddá eanandoalli ja eanadoalli, čállá appa ráhkadeaddji, John Anders Sikku preassadieđáhusas.
Sávvá appa boahtit ávkin
Sikku sávvá ahte Sámi synonymat applikašuvdna boahtá ávkin ollugiidda, sihke ruovttus, barggus ja meahcis ge, ja ahte Jovnna-Ánde Vest bargu oažžu ođđasit fuomášumi, dán háve ođđa hámis, olbmuid telefuvnnaid siste.
– Stuora giitosat Jovnna-Ándii go searvvai prošektii. Ollu giitu maid Norgga Sámediggái doarjaga ovddas. Doarjaga haga ii livččii vejolaš dákkár prošeavtta čađahit, čállá Sikku.
Sámi synonymat girjjis oassi:
«Sánit leat mealgat. Valjis leat dakkárge sánit, mat gullet juo dološ sámeeallimii. Lean ná háliidan čohkket dan sátneriggodaga, mii gávdnui sámegielas vel moadde buolvva dás ovdal. Muhto lean leamaš gearggus dohkkehit maiddái sániid, mat leat easkka dáid jagiid boahtán viidábut atnui. Sáhttáge dadjat ahte Sámi synonymat -girjjis leat guokte ulbmila; vuosttažettiin girji lea veahkkin beaivválaš giellageavahandilálašvuođain, ja nuppádassii dat lea ávkkálaš veahkkeneavvu daidda, geat háliidit vuđoleappot oahpásmuvvat sámegiela sániide. Doaivvun ahte girji sáhttá deavdit buot giellageavaheaddjiid dárbbuid.
Ja loahpas vel buorre ráva. Ii gánnát geavahit buiga amas sániid, jos ii leat sihkar daid geavaheamis. Vaikko dát girji leage sámegiela synonymaid birra, de lea buorre muitit ahte guokte sáni hárve vástideaba ollásit nubbi nuppi.» – Jovnna-Ánde Vest, Parisis čakčamánu 21. beaivve 2005.
