-Almmuhus-
OĐĐASATČállán detektiivva muitalusa nuoraide

Čállán detektiivva muitalusa nuoraide

-

-

Kirsi Máret Paltto almmuha dán mánu iežas nuoraidgirjji «Gos don leat, Elle? Son čálligođii girjji go oassálasttii Sámedikki ja Sámi Girje­čálliid Searvvi vuosttaš čállinkurssas moadde jagi dás ovdalis.

Miessemánus dán jagi, beaivi ii leat vuos mearriduvvon, almmuha Kirsi Máret Paltto iežas vuosttaš čáppagirjjálašvuođa girjji sámegillii.

Girjjis lea garra girjeolggoš, leat 130 siiddu ja stuorát bukstávat go dábálaččat lávejit.

Lágádus lea ABC-Company E-skuvla AS. ­Girjji lea Sámediggi ruhtadan.

– Mun lean jurddašan nu ahte min mánáide ja nuoraide galget leat gelddolaš girjjit maid lea suohtas lohkat. Dát girji gullá ­fikšuvnna šaŋŋerii ja lean čállán nu ahte galggašii leat gelddolaš ja somá. Lean smiehttan girji heivešii nuoramus nuoraide, sullii 10 jagis gitta 13-14 jahkái ja lea geahpas lohkat, lohká Kirsi Máret Paltto ja lohká girji heive maid ollesolbmuide.


Garra olggoš: Liisa Tellervo Helander lea hábmen girjji ja sárgon muitalussii govaid girjái: «Gos don leat, Elle?»
Govva: ABC-Company E-skuvla AS

Álo hurrah go ođđa girji ilbmá

Sámi Joatkkaskuvlla Kárášjoga ­girjerádjosa hoavddas Nina Ødegaardas ihtet mojit go bláđe Kirsi Máret Paltto girjji «Gos don leat, Elle?» mii almmuhuvvo dál miesse­mánus.

– Logan Hurrah! juohke álo go almmuhuvvo ođđa girji sáme­gillii nuoraide, lohká son.

 

Stuorra dárbu nuoraidgirjjiide

Girjerádjosa hoavda, Nina Ødegaard, moddjesta go muitá man gallii ja man olu jagiid son lea ­sávvan ahte boađášedje ođđa sámegiel girjjit sámi mánáide ja nuoraide.

Lohká gávdnojit ain nu uhccán girjjit mat almmuhuvvojit sámegillii.

– Nuorat dárbbašit lohkat eanet čáppagirjjálaš girjjiid. Mađe eanet girjjiid nuorat lohket, dađe buore­but buorrána giella beroškeahttá man gielas de leš sáhka. Beassat olu lohkat, lea hirbmat dehálaš nuoraid giellaovdaneapmái, lohká son.

Lohká danin dárbbašit nuorat somás girjjiid mat giktet sin lohkat olu.

– In leat lohkan girjji, muhto soaitá leat somá, gelddolaš ja ­soaitá maid gánddaid giktit lohkat eambbo, lohká Sámi Joatkkaskuvlla Kárášjoga girjerádjosa hoavda Nina Ødegaard.

 

Gos don leat, Elle?

Girjji muitalus lea gándda Jovnna birra, gii áiggošii rumbokursii, muhto ii beasa go su eadni lea ­vahkuid eret, iige beasa márkanii dan dihtii.

Boares stobus, lovttas, son dearpá buot rumbun ja fáhkka gávdná juoidá mii doalvu su ­čearggus dáhpáhusaide.

– In mun hálit eambbo muitalit. Doppe gávdná unna nieiddaža, Elle. Lea detektiivva muitalus, ­čilge Kirsi Máret Paltto.

 

Čállinkursa ja láddanáigi

Kirsi Máret Paltto muitala son ­oassálasttii Sámedikki ja Sámi ­Girječálliid Searvvi vuosttaš ­čállinkursii mii bisttii guokte jagi (2015-2017), muhto dárbbašii veaháš láddanáiggi ovdal go dovddai dál lea girji gárvvis.

Son namuha sus leat leamaš bagadallin Siri Broch Johansen, Kerttu Vuolab ja Marry Ailonieidda Somby.

– Fertejin bidjat Máret-nama velá amas eai seagut mu goskkiin, beakkán girječálliin, Kirsti ­Palttoin, muitala Kirsi Máret ­Paltto ja lohká su goaski lea su ­ovdagovva.

Kirsi lea riegádan 1974 Västerås gávpogis Ruoŧas.

Ruovttus hálle suomagiela ja šiljus ruoŧagiela.

Son hállá gávcci giela.

16-jahkásažžan fárrii Ohcejoga gildii, Fierranjohkii, vázzit sámi logáhaga Ohcejogas gos oahpai davvisámegiela.

 

Álki lohkat ja áddet

Suoma beale Deatnugáttis, Roave­sávvonis, bajásšaddan, Liisa Teller­vo Helander lea hábmen ja sárgon vuogas govaid fierranjohkalačča, Kirsi Máret Paltto, girjái.

– Lei álki lohkat ja áddet dán girjji. Ja somá. Bohte mu millii eatni muitalusat. Lei hirbmat buorre ovttasbargu munno gaskkas, ­čálli ja sárgojeaddji gaskkas. Dávjá lea lágádusa ja sárgojeaddji gaskkas dat ovttasbargu, lohká Liisa ­Tellervo Helander.

-Almmuhus-