Saia Stueng ođđa nuoraidromána, nubbi girjin ráiddus; «Hamburgerprinseassa – Eallá dušše oktii» almmuhuvvui ovdalaš beassážiid.
«Hamburgerprinseassa – Eallá dušše oktii» lea Stuenga nubbi girji, ja lea guhká vurdojuvvon joatkka su vuosttaš girjái.
Čálli vuosttaš romána ráiddus; «Hamburgerprinseassa (2017) vuvddii bures ja vuosttaš deaddilanlohku nogai vuorkkás oanehis áiggis. Maiddái nubbi deaddilanlohku lea nohkan vuorkkás. Vuosttaš girji lea dál vuovdimassii eGirjin neahtas, ja girji lea maid jorgaluvvon dárogillii ja lea vuovdimassii báberhámis.
Saia Marilena Stueng lei mielde sámi girječállioahpus Čális fal! áigodagas 2015–2017, ja sus lea sámi girjjálašvuođa mastergráda UiT – Norgga árktalaš universitehtas. Son bargá dál girjjálašvuođadiehttin ja lea váldimin doavttirgráda sámi girjjálašvuođadiehtagis Sámi allaskuvllas.
Romána gieđahallá fáttáid nu go seamma sohkabeali ráhkesvuođa, earáláganvuođa, traumaid, digitála givssideami ja eallinmovtta gávdnama.
Girji lea gávdnamis davvisámegillii sihke báberhámis ja eGirjin.
Girjemáidnun:
«Ii dát lean dábálaš eahket, dát lei dat maŋimuš eahket goas buot lávii leat dábálaš ja oadjebas. Dat eahket go buot rievddai. Mu eallin rievddai ja eadni šattai amasolmmožin.»
Máren vásiha dan mas olles eallima lea ballan ja ferte mearridit áigu go eallit dainna vai jápmit. Son addá eallimii maŋimuš vejolašvuođa. Mii oahpásmuvvat Márena mánnávuođain, etniin ja borranváttuid álgguin. Dál ii leat šat Máhtte gii mearrida visot, dál lea mávssaheapmi aiddo álgán.
«Ovdal go háhppehan jurddašit dobbelii, de boahtá Ánne lagabui ja cummesta mu. Máilbmi bisána, ja jorribiegga mu siste golke.»
