Stáhta geaidnodoaimmahat dárkkistii johtolaga Norgga ja Suoma rádjarasttildanbáikkis Geađgeluobbalis mannan maŋŋebárgga eahkeda ja gaskavahku ovdalgaskabeaivvi. Sii dárkkistedje oktiibuot 72 lossavuojána ja okta Suoma gálvobiila bissehuvvui ja váido go lobiheamet fievrredii gálvu Oslos Finnmárkui.
Suoma ja Norgga rádjarasttildanbáikkis Geađgeluobbalis, mii lea Eanodaga ja Guovdageainnu gieldda rája alde, dárkkistii Stáhta geaidnodoaimmahat vuojániid. Oktiibuot dárkkistii geaidnodoaimmahat 72 losit fievrru čakčamánu 29. ja 30. beaivvi, čállet sii preassadieđáhusas.
Vihtta vuojána bissehuvvojedje, eai ge beasa gosage vuoddját ovdal go ášši lea čorgejuvvon. Earret eará lei lobihis gálvofievrredeapmi, seađas glássa, gáibádus ahte váldit eret biilla registrerengalbba, váilevaš fievrredanlobi dokumenttat ja okta mas ledje teknihkalaš váillevašvuođat. Viđas ožžo dárkkistangáibádusa go ledje teknihkalaš váilevašvuođat.
Okta Suoma gálvo-/guorbmebiila oktan goallosjorriin, bissehuvvui go lei fievrredeamen lobiheamet gálvvu Oslos Finnmárkui, nu gohčoduvvon «Kabotasje». Fitnodat váidojuvvo ja gálvofievrredeami ferte Norgga gálvofievrredeaddji joatkit. Suoma guorbmebiilla vuoddji váidojuvvo go lea rihkkon vuodjin- ja vuoiŋŋastanáiggi.
Golbma vuoddji ožžo čálálaš váruhusa go leat rihkkon vuodjin- ja vuoiŋŋastanáiggi. Okta vuoddji Norgga gálvo-/guorbmebiillain oktan goallosjorriin ferte máksit 8000 kruvdnosaš divada go sus ledje njeallje gollan biilarieggá. Golbma biilavuoddji fertejit máksit 1500 kruvdnosaš divada go eai geavahan biilaboahkána. Okta guorbmebiila gáibiduvvui massit biillagalbbaid, muhto vuoddji beasai ordnet ášši báikkis nu ahte ii manahan biilagalbbaid.
