Dássážii leat 28 olbmo duššan johtolagas ja diibmá dušše seamma áigodagas 18 olbmo. MC-áigodat lea áiddo álgán ja guokte MC-vuoddji leat juo duššan cuoŋománus.
Diibmá dušše 21 olbmo MC-lohkohisvuođain, mii lea mealgat eanet ovddit jagiid ektui. Olusat leat rahkaneamen vuodjit mohtorsihkkeliin dán geasi.
Miessemánu 1. beaivvi dieđihuvvui vuosttaš jápminlihkohisvuohta mohtorsihkkeliin.
– Lea mealgat stuorát riska geavvat duođalaš lihkohisvuhtii MC:in go biillain. Mohtorsihkkelvuoddji ii leat nu bures suddjejuvvon go biillas ja vuodjit dakkár vuojániin lea maid eanet gáibideaddji. MC-vuoddji ferte buorebut smiehttat go biilavuoddji mo galggašii sihkkarit vuodjit. Eat mii hála dušše nuorra albmáid birra geat vudjet nu johtilit go sihkkel manná, muhto rávisalbmáid birra geat vudjet menddo jođánit geaidnomohkkái, eai ge nagot doalahit vuojána geainnu alde, lohká Trygg Trafikk preassahoavda Christoffer Solstad Steen preassadieđáhusas.
Son muitala diibmá miessemánus dušše 19:s johtolagas ja sávvá ahte nu ii geavaše dán jagi miessemánus maid. Son rávve olbmuid jierpmálaččat vuodjit, leat čielggus, geavahit biilaboahkána ja heivehit leavttu johtolaga mielde. Christoffer Solstad Steen muittuha ahte miessemánu leat maid russat jođus ja ávžžuha nuoraid ovddasteaddjiid áimmahuššat ahte nuorat eai vuoje vuojániiguin mas sihkkarvuohta ii leat fuolahuvvon.
