Rovdata ávžžuha buohkaid geat johtet meahccis ja jus fuomášit geatkki luottaid, čoaggit geatkkebaikkaid dan luotta bálddas. Nu sáhtát don ge leat mielde geatkke-DNA-vákšumis Norggas. Baikka čoakkát buhtes plastihkkabusse sisa ja doalvvut dan báikkálaš Stáhta luonddubearráigehččui (SNO).
Rovdata analysere DNA baika- ja guolgaiskosiin ja bohtosiiguin vákšot getkkiid Norggas, nu ahte eai dárbbaš muosehuhttit daid. Cokkas lubmii buhtes plastihkkabussiid gárvvisin jus deaivvat vuohttit geatkki ja gávnnat geatkebaikka.
– Mii háliidat dušše daid baikaiskosiid mat leat gávdnon geatkkeluotta bálddas. Iskosiid DNA-analysat muitalit midjiide mo geatki birge Norggas. It galgga guoskat baikkii. Jorggo busse baikka birra ja bija dan jiekŋudanboksii dassážii go sáhtát dan addit SNO:i. Jus gávnnat guolggaid, de sáhtát bidjat daid plastihkkabussii dassái go boađát ruoktot ja das maŋŋá sirddát bábirkonvoluhta sisa. Dan ii galgga jiekŋudit, lohká Rovdata jođiheaddji Jonas Kindberg preassadieđáhusas.
Baikaiskosiid čoaggin lea ođđajagimánu 1. beaivvi rájes gitta geassemánu 1. beaivvi rádjái. Kindberg lohká galgá soahpat SNO:in geasa galgá dan addit, mii árvvoštallá ja registrere daid ja sádde viidasabbot Rovdatai. Iskosiid merke iežas namain ja čujuhusain, gos lea gávdnan ja goas, man gielddas ja kártareferánssain. Dieđuid sáhttá maŋŋá sáddet telefovnna dahje e-poastta bokte.
