Fylkkasuohkan ávžžuha buohkaid dál atnit njálbmesuoji go vánddardit kollektiivajohtolagain.
Romssa ja Finnmárkku fylkkasuohkan ávžžuha garrasit dál buohkaid atnit njálbmesuoji go johtet kollektiivafievrruid mielde Álttás ja Hámmerfeasttas.
– Dát guoská buot fanasruvttuide Finnmárkkus gos ii leat vejolaš doalahit dohkálaš gaskka, buot bussiin Álttás ja Hámmerfeasttas ja bussiin mat vudjet daidda báikkiide ja eret dain báikkiin, čállet sii.
Fearggain galgá atnit njálbmesuoji go manná sisa dáin ruvttuin: Linjá 560 Strømsnes- Kjerringholmen (Ánnásuolu- Rávdnjenjárga) ja linjá 550 Korsfjord- Nyvoll Fielvuonas.
–Ávžžuhus sáhttá rievdat bággun
Preassadieđáhusas čállá fylkkasuohkan ahte hellodatbasiid geažil vurdet sii olu johtolaga dáid beivviid. Sii ávžžuhit olbmuid čuovvut kollektiivajohtolaga mátkenjuolggadusaid, doallat gaskka, ii ge mátkkoštit jus ii leat dárbu.
Fylkkasuohkan gulahallá suohkana njoammuneastadeddjiiguin, ja vurdet báikkálaš njuolggadusaid sihke Álttás ja Hámmerfeasttas.
– Bivdit olbmuid doahttalit dan maid báikkálaš eiseválddit dieđihit. Ávžžuhusat sáhttet rievdat báikkálaš gáibádussan. Mii rávvet olbmuid háhkat dieđuid movt geavahit njálbmesuoji, čállet sii.
