«Flip-flopsat» ja sandálat sáhttet darvánit biilamáhtáide ja pedálaide, ja dat sáhttá dagahit ilgadis dáhpáhusaid johtolagas. – Geavat áiggi lonuhit skuovaid ovdal go vuoddját biillain, ávžžuha NAF preassahoavda Ingunn Handagard.
Go vuoját biillain, de berrejit dus skuovat mat bissot bures juolggis. «Flip-flopsat» ja eará sandálat maid ii leat vejolaš giddet sáhttet njulgestaga váralaččat johtolagas. Dat sáhttet darvánit sihke biilamáhtáide ja pedálaide.
– Vuordemeahttun dáhpáhusas fertet jođánit reageret, ja dalle fertet leat sihkkar ahte skuovva čuovvu gássapedálas goazanii, lohká NAF preassahoavda Ingunn Handagard preassadieđáhusas.
Jus olmmoš geavaha eanaš sandálaid geasset, de ávžžuha NAF biilavuddjiid bidjat viehkanskuovaid biilii.
Lonut skuovaid
– Ii olmmoš ádján guhká lonuhit skuovaid, ja de šaddá biilamátki eanet dorvvolaš. Vaikke leat mannamin dušše buvdii dahje sáttogáddái, de lea dan veara geavahit dáid sekunddaid lonuhit skuovaid. Johtolagas leat smávva marginálat ja váikkuhusat sáhttet stuorrát jus juolgi darvána masa nu, lohká Handagard.
NAF preassahoavda dadjá ahte ii berre suohkuiguin dahje rabas julggiiguin ge vuodjit.
– Smávva geađggáža dihte sáhttá olmmoš gaikkihit juolggi, ii ge de šat deaddil pedála dábálaččat, lohká son.
