NAF oaivvilda ahte berre šaddat álkit oažžut buhtadusa jus biila billašuvvá dahje roakčana heajos geainnuid geažil.
Go muohta suddá, de lea hui dábálaš ahte asfálta lea luoddanan ja ahte geainnuin leat rokkit.
40 proseantta biilaeaiggádiin leat vásihan ahte biila billašuvvá dahje roakčana heajos geainnuid geažil, čájeha NAF guorahallan man Norstat čađahii diibmá.
– Jus biila billašuvvá heajos geainnuid geažil, de berrešii álkit oažžut buhtadusa, lohká NAF preassahoavda Ingunn Handagard preassadieđáhusas.
Dáidet buoredit geainnuid
Geainnut mat ovdalaččas leat heajut šaddet vel vearrábun giđđat.
– Olu fylkkageainnut leat billašuvvan ja daid berrešii divodit. Jus geaidnoeaiggádat šattaše váldit stuorát ovddasvástádusa billašuvvan biillaid ovddas, de dáiddáše buoredit geainnuid, lohká Handagard.
Son dadjá ahte biilaeaiggádiidda lea váttis oažžut buhtadusa go leat menddo garra njuolggadusat dan ektui. Geaidnoeiseválddit galget vuos oažžut dieđu billašuvvan geainnu birra, ja dasa lassin galgá várrejuvvot áigi sihke šiltemii ja divodeapmái. Jus daid eavttuid eai deavdde, de lea easka vejolaš oažžut buhtadusa.
– Heajos geainnuin ii leat dušše váttis vuodjit, muhto dat váikkuhit maiddái johtolatsihkarvuhtii. Danin oaivvildit ahte gielddat, fylkkagielddat ja stáhta berrejit váldit stuorát ovddasvástádusa geaidnoeaiggádin.
