Sáhkkomáksomearit galget loktejuvvot, jus ráđđehus oažžu nu go sii háliidit. – Lea nuppes oanehis áiggis go sáhkkomáksomearit lasihuvvojit. Gažaldat lea váikkuha go dađistaga stuorát sáhkku ulbmila mielde, dadjá NAF preassahoavda Ingunn Handagard.
Guovvamánus dán jagi lasihuvvojedje sáhkkomáksomearit geaidnojohtolatlága rihkkuma ovddas 30 proseanttain. Dál áigu ráđđehus fas lasihit máksomeriid, vai bissu ovtta dásis haddegoargŋumiin. NAF oaivvilda ahte lassáneapmi boahtá menddo árrat.
– Mii ohcat vuđolaš guorahallama dan birra ahte leat go lassánan sáhkuin duođai leamaš váikkuhusat johtolatsihkarvuhtii ja leat go rihkkumat geahppánan maŋŋel lassáneami, cealká Handagard.
Son čujuha dasa ahte go ráđđehus bajidii meriid guovvamánus dán jagi, de ággan dasa lei johtolatsihkarvuohta.
– Dál lea fas jahki goas leat ollu geat duššet johtolagas. Jus stuorát sáhkkoheamit eai váikkut lohkui galle láhkarihkkuma dahje lihkohisvuođa leat dáhpáhuvvan, de orrot lassáneamit ákkastallojuvvon eambbo danin go ahte lea dárbu oažžut ruđaid stáhtakássii go johtolatsihkarvuođa doaibmabijuide, dadjá Handagard.
