Skandinávias leat dál oktiibuot 1639 albasa registrerejuvvon.
Ođđa raporta, man Rovdata ja Viltskadecenter leat ráhkadan Birasdirektoráhta ja Naturvårdsverket ovddas, čájeha ahte albasat lassánit Skandinavias.
Norggas ja Ruoŧas lea oktasaš vuohki movt gozihit albasiid, ja váldofokus lea registreret man ollu albbasbearrašat gávdnojit.
Mannan dálvvi lea estimerejuvvon ahte Norggas ja Ruoŧas leat oktiibuot 280 albbasbearašjoavkku. Dat leat lassáneapmi ovddit dálvvi ektui, ja lassáneapmi lea Ruoŧas.
– Lassáneapmi Ruoŧas mearkkaša ahte Skandinávia albbasnálli lassána 256 albbasbearrašis 280 albbasbearrašii. Dain leat 67 albbasbearraša Norggas ja 213 Ruoŧas, čilge Rovdata jođiheaddji Jonas Kindberg.
1639 albasa Skandinávias
Okta albbasbearaš registrerejuvvo njiŋŋelasalbasiin oktan ovttain dahje eambbo čivggaiguin.
Dan ektui man ollu albbasbearraša leat registrerejuvvon, rehkenastojuvvo man ollu albasat leat Skandinávia albbasnális.
Norggas ledje sullii 395 albasa ovdal go earrebivdu álggii mannan dálvvi, Ruoŧas ges 1244 albasa.
– Dat mearkkaša ahte Skandinávia albbasnális leat 1639 albasa, čilge Kindberg.
