Gielddus sáhtášii unnidit meahccebuollimiid ja livččii buorre guoddevašdoaibma, oaivvilda Brannvernforeningen.
Cuoŋománu 15. beaivvi rájes gitta čakčamánu 15. beaivái lea oppalaš dolastallangielddus Norggas. Dalle ii leat dábálaččat lohpi cahkkehit dola, háválasgrilla, dolastallanlihtiid ja eará, jus ii leat ohcan ja ožžon lobi suohkanis.
– Mii jáhkkit ahte oallugat eai dieđe ahte dolastallangielddus guoská maiddái háválasgrillaide. Mii leat sihkkarat das ahte gielddus dagahivččii ahte eai šatta nu ollu meahccebuollimat. Jus háválasgrilla adno boastut, de ii galgga ollu mannat boastut ovdal go liekkas addá bulleha eatnama dahje goike suinniid ja vuovdevuoládaga, cealká Brannvernforeningena hálddahusdirektevra Rolf Søtorp preassadieđáhusas.
Okta váttisvuohta háválasgrillain lea Søtorpa mielas dat go dat sáhttet ođđasit buollát maŋŋel go daid orru jáddadan. Danin lea grillas váttis beassat eret sihkkaris vugiin.
