Olgoeallin ja luondduvásáhusat leat bivnnuhat dán geasi. Ođđa logut maid Ipsos lea ovdanbuktán, čájehit ahte eambbo nuoraid go ovdal dál plánejit olgun ijastit.
– Dát leat hui buorit logut. Go oaidnit daid loguid mat čájehedje man gallis idjadedje olgun čakčat, de eat leat hirpmástuvvan, dadjá Norsk Friluftsliv váldočálli Lasse Heimdal preassadieđáhusas.
Iskosis dieđihit 73 proseantta nuorain gaskal 15 ja 24 jagi ahte sii plánejit olgun idjadit geasset. Dat lea lassáneapmi logiin proseanttain diimmáža ektui. Oppalaš lohku álbmogis lea 46 proseantta, dahje masá juohke nubbi norgalaš.
Positiivvalaš treanda
Norsk Friluftsliv lea ilus go olgoidjadeapmi lea bivnnut nuoraid gaskkas.
– Dát lea buorre treanda. Mii diehtit ahte go nuorran vánddarda luonddus, de čuvvot dát buori dábit mielde ollesolbmoeallimii. Dat lea sielu dálkkas, oaivvilda Heimdal.
