131 vuodjinfievrru lea dárkkistuvvon dán vahku Finnmárkkus, 12 vuodjinfievrru ožžo geavahangildosa ja olu vuoddjit sáhkkohalle.
Stáhta geaidnodoaimmahat čađaha dárkkisteami geaidnoluottain dagahan dihtii buoret johtolatsihkkarvuođa johtaleddjiide. Dán vahku leamašan olgodárkkisteamit Kárášjogas, Deanus, Girkonjárggas ja Leavnnjas.
– Buohkat galget beassat mátkkoštit dorvvolaččat Norgga geainnuid alde. Dárkkisteamit galget sihkkarastit gilvoeavttuid suorggis ja ámmátvuoddji bargoeavttuid, čállá Stáhta geaidnodoaimmahat preassadieđáhusas.
Vuojánat maidda dán háve ledje bidjan fuomášumi dárkkisteamis ledje lossavuojána, geahppavuojánat ja gálvobiillat. Stáhta geaidnodoaimmat dárkkistii oktiibuot 96 lossavuojána ja 35 geahppavuojána.
Boađus dárkkisteamis:
Njeallje vuoddji váidojedje, okta vuoddji sáhkkohalai beare olu deattuin vuodján. Golbma raporta sáddejuvvojedje ja oktiibuot 12 vuojána ožžo geavahangildosa. Ovtta vuodjinfievrrus čuhppe čujuhusmearkka ja 22 vuodjinfievrru ožžo čálalaš váilevašvuođaid. Okta vuoján oaččui kihtetsáhku ja muđuid sáhkkohalle 5 vuoddji.
Gáldu: Stáhta geaidnodoaimmahat
6000 kilo beare ollu deaddu
– Guorbmebiila, mas lei sáddogilvinrusttet, bissehuvvui ja das lei 6000 kilo beare olu deaddu mielde. Badjelmeare deattu vuoddji sáhkkohalai 43 000 ruvnnuin. Okta vuoddji sáhkkohalai 2000 ruvnnuin deahkaid dihtii, okta fitnodat sáhkkohalai 8000 ruvnnun go vuodjinfievrrus ii lean bummamáksinrusttet, čállá stáhta geaidnodoaimmahat.
Ovdaákselis doddjon dávgi
Girkonjárggas fitne guokte guorbmebiilla teknihkalaš dárkkisteamis Stáhta geaidnodoaimmahaga dárkkistanhállas.
– Guktot vuodjinfievrruin ledje heajos goazanat goallosvuovnnas, ja okta oaččui vuodjingildosa go ovdaákselis lei dávgi doddjon, čállá Stáhta geaidnodoaimmahat. Stáhta geaidnodoaimmat lea maid raporteren vearroetáhttii guokte guorbmebiilla go eai lat divatdieđuid sádden sisa goallosvovdnageavaheami geažil.