Norgesgruppen vuvddii 10 000 tonna eanet šattuid ja ruotnasiid diibmá go ovddit jagi, smávva njálgáid johtu ges njiejai 560 tonnain, čájehit ođđa logut.
Eiseválddit leat guhkit áigge geahččalan rievdadit norgalaččaid borrandábiid. Olbmot galggaše borrat eanet ruotnasiid, šattuid, murjjiid, roavva rievdnebuktagiid ja guoli, ja livččii maid dáhttu ahte álbmot unnidivččii ráhkaduvvon bierggu, rukses bierggu, sáltti ja sohkkara.
Mihtut
Maiddái Norgesgruppen lea álggahan olu doaibmabijuid vai norgalaččat borragoađáše eanet dearvvašlaš borramuša. Ovdal jagi 2020 galggašedje Kiwi, Meny, Spar ja Joker gávppit vuovdit 22 proseantta eanet šattuid ja ruotnasiid, ja mearraborramuš johtu galggašii lassánit 16 proseanttain. Sálte- ja sohkarjohtu ges galggašii vuoliduvvot 20 ja 10 proseanttain.
Unnit sohkar
Gávpeovttastus lea vuovdán eanet šattuid ja ruotnasiid diibmá, muhto johtu lea dušše lassánan 2,6 proseanttain. Sii leat dattetge duđavaččat go vuvdet unnit sohkkara. 2016 rájes 2017 rádjai njiejai sohkarjohtu 4,3 proseanttain. Sii leat ovdamearka dihtii vuovdán 560 tonna unnit smávva njálgáid, jáhkkimis danin go beassážiid áŋgirušše vuovdit smávva bovssaid main ledje šattut ovdalii go vuovdit njálgáid hálbái. 560 tonna mielddisbuktá sullii 100 grámma unnit njálgáid juohke norgalačča nammii, čállá NTB.
