Vaikke eai ožžon ge doarjaga Sámedikkis, buvttadit ođđa bargobiras app:a sámegillii, de fitnodat liikká čađahii prošeavtta.
Vaikke eai ožžon ge doarjaga Sámedikkis, buvttadit ođđa bargobiras app:a sámegillii, de fitnodat liikká čađahii prošeavtta.
– Min ovttabargoguoimmit Nordic HSE Groupas evttohedje ahte eat go ráhkadivččii dán app:a sámegillii. Nu mii jurddašišgođiimet dán birra, ja imaštalaimet manne eai gávdno álkes elektrovnnalaš rapporterenreaiddut sámegillii Dearvvašvuođa-, biras- ja sihkkarvuođa dáfus (DBS). Mii jearaimet de: leago nu ahte sámi álbmogis ii leat mihkkege dahkamušaid DBS:in. Diehttelasat ii leat nu, de gávnnaheimmet ahte lea buorre jorgalit dán sámegillii maid, čilge beaivválaš jođiheaddji Trond Hansen preassadieđáhusastis.
Mellora As fitnodat, mii lea ráhkadan dán buktaga mii lea nammaduvvon Norgga buoremus bargobirasbuktagin, lea áiddo gárven sámegiel veršuvnna «HSEQ Free» appas.
Mellora AS ráhkadii 2012:s dan mii šattai máilmmi vuosttaš smarttelefuvdna-appa man bokte sáhttá rapporteret spiehkastemiid, áicamiid, «meastadáhpáhusaid» ja buoridanmoniid dearvvašvuođa, birrasa, sihkkarvuođa ja kvalitehta dáfus.
Dađistaga leat maid ođastan applikašuvnna nu ahte sáhttá maiddái dokumenteret nu gohčoduvvon sihkkaris-barggu analysa, dárkkistemiid ja diibmoregistreremiid.
Preassagovva: Mellora AS
100 duhát geavaheaddji
Dán buktaga geavahit fitnodagat iešguđet surggiin sihke Norggas ja olgoriikkas. Nuvttáveršuvnna leat badjel 100 000 geavaheaddji háhkan.
– Mii válljiimet Sámedikkis ohcat ruhtadoarjaga ráhkadit dán sámegillii, go gárte oalle olu golut. Dađi bahábut eat ožžon sis goassege vástádusa, ja mii ieža govččaimet buot goluid, dadjá Hansen.
Álkit geavahit eatnigiela go amasgiela
Sámegielat appain sáhttet geavaheaddjit álkit rapporteret ja maŋŋil meannudit sihke dáhpáhusaid mat goasii gárte bártin, sihkkarvuođadárkkistemiid ja riskaárvvoštallamiid.
– Vaikke eai soaitte leat nu máŋggas geain lea sámegiella váldogiellan, de jáhkán liikká ahte sidjiide geat gullet dan jovkui, lea álkit geavahit sámegiela go dárogiela dahje eaŋgalasgiela, loahpaha Trond Hansen.
