Batterijakten (Báhtterbivdu) lea skuvlagilvu mii álgá odne, njukčamánu viđat beaivvi ja bistá golbma vahku ovddos guvlui. Dasa servet 4. luohkáhasat miehtá Norgga, nu maiddái Finnmárkkus.
Ulbmil Batterijakten skuvlagilvvuin lea oahpahit skuvlamánáide mo buorebut sáhttá hálddašit resurssaid. Miljøagentene-searvi lágida dan ovttas Clas Ohlsoniin, Vartain ja Batterireturain. Dat lágiduvvo jo 12. gearddi.
– Oassálastit ožžot čuoggáid dan ovddas go čogget báhtteriid ja go čovdet vahkkosaš bargobihtáid. Vuoitit sáhttet oažžut ruđalaš bálkkašumiid iežaset luohkáide, muitaluvvo preassadieđus.
Loahpas juhkkojit golbma 15 000 ruvdnosaš váldobálkkašumi.
1000 tonna
Jahkasaččat dan rájes go Batterijakten lea álggahuvvon leat 4. luohkáhasat hui aktiivvalaččat čoaggán báhtteriid. 12 jagis čogge mánát measta 1000 tonna báhtteriid.
– Oassálastit leat álo áŋgirat. Mii jáhkit Batterijakten šaddan hui dovddus dáhpáhussan danne go oahppit oassálastet masa nu mii lea hui konkrehta. Mii oaidnit ahte mánát duođai áŋgiruššat ja ožžot earenoamáš oktavuođa klássalanjas, dadjá Swane.
Nuorat unnit sirrejit
Loop ja Opinion iskkadeami logut čájehit ahte 80 proseantta norgalaččain muitalit ahte sirrejit báhtteriid ruovttus. Nuorain, gaskkal 18- ja 25-jagi, leat dušše 65 proseantta geat dadjet ahte dahket dan.
– Juohke jagi bullet máŋga ruskarusttega danne go geavahuvvon báhtterat leat bálkestuvvon boasttu vuogi mielde. Báhtterat galget teipejuvvot ja dasto dolvojuvvot resirkuleremii, muitala Batterijakten prošeaktajođiheaddji Ingvild Swane.
Lágideaddjiid mielas mánát gádjot báhtteriid bálkestuvvomis bázahuslihttái, ja dat lea dehálaš luonddu dihte.
– Báhtteriin leat hárvenaš ávdnasat. Ovdamearkka dihte dábálaš báhtterat sisttisdollet ávdnasiid nugo siŋkka man lea dehálaš ođđasis atnit. Dat lea issoras dušši mánahit ávdnasiid mat leat báhtteriin dušše dan dihte go dat bálkestuvvojit boastut. Dán birra mii háliidit oahpahit mánáide Batterijaktenis, dadjá Swane.
13 skuvlaluohká Finnmárkkus
Finnmárkku skuvllain servet maiddái oassi 4. luohkáhasain. Oktiibuot 13 skuvlaluohká iešguđet ge skuvllain nu go Álttás, Hámmerfeasttas, Guovdageainnus, Porsáŋggus, Várggáin, Mátta-Várjjagis, Báhcavuonas ja Muosáin.
