Norgga báŋku lokte stivrenreanttu 0,5 proseanttain 2,75 prosentii ja borgemánus loktejit jáhkkimis reanttu vel eanet. Dasto sáhttá viessoloatnareantu goargŋut gitta 5,5 prosentii.
Norga lea guhká rahčan ekonomiijain, muhto dál oaivvilda Guovddášbáŋkku hoavda Ida Wolden Bache ahte ekonomiija lea buorráneame.
– Reantu ferte ain goargŋut ja eambbo go ovdal, olahan dihte unnit inflašuvnna. Mihttomearri lea ahte inflašuvdna niedjá guovtti prosentii, lohká Guovddášbáŋkku hoavda.
Dál lea haddegoargŋun 6,7 proseanttas ja lea badjeleappos go Guovddášbáŋku ovdal lea árvvoštallan. Reantogoargŋuma olgoriikkas, stuora bálkágoargŋuma ja geahnohis ruvnnu lohket sivvan haddegoargŋumii.
– Jus eat lokte reanttu, de sáhttet sihke hattit ja bálkkát ain jođánit goargŋut ja nu inflašuvdna bissu seamma dásis. Dalle šattašii divrasabbon njeaidit hattiid, lohká Bache.
Stivrenreantu sáhttá goargŋut 4,25 prosentii čakčat. Dasto sáhttá viessoloatnareantu lassánit gitta 5,5 prosentii, árvvoštallá Norges Bank.
– Ovddasguvlui máŋgasis šaddá gáržžit ekonomiija. Soapmásat šaddet jáhkkimis unnidit ruhtageavaheami ja soapmásiidda šaddá hástaleaddji áigi. Muhto go loktet reanttu, de haddegoargŋun bisána ja šaddagoahtá hálbbit, ja nu de olbmuin fas šaddá buoret oastinvejolašvuohta, oaivvilda Norges Bank.
– Jus inflašuvdna unnu jođáneappot, de sáhttet reanttut ge niedjat, lohká Bache.
Maŋŋel go mearreduvvui reanttu loktet, de gievrrui Norgga ruvdnu 13-14 evrriin. Dál máksá okta euro 11,56 ruvnnu, čállá Dagens Næringsliv.
(©NTB)
