Dan botta go olu ollesolbmot oidnet rehketlána lassáneamen divrras áiggis, de ohppet mánát ja nuorat buorebut mo galgá láhttet ruđaiguin.
Dan čájeha iskan man Kunnskapsbanken lea čađahan 15-, 16- ja 17-jahkásaš skuvlaohppiid gaskkas Nordlánddas, Romssas ja Finnmárkkus skábmamánus ja juovlamánus.
– Geavaheaddjiidekonoman lean mun oahpahan badjel 800 daid 3300 ohppiin geaiguin deaivvadin dan áigodagas. Ovddit jagiid vástádusaid ektui, de vástidit nuorat ahte sii hálddašit ruđaid buorebut go ovdal, sii dihtet man olu sis lea konttus, sis lea buoret áddejupmi ruhtaseastimis ja eanet máhttu kredihttakoartta birra ja geavaheaddjevealggi birra, lohká Davvi-Norgga Seastinbáŋku 1 geavaheaddjiekonoma Linda Tofteng Eliassen.
Politiijadirektoráhtta dieđiha ahte sii vižžet bákkuin vealggi daid nuoramus rávisolbmuin. Dávjá lea dat justa kredihttakoarta- ja geavaheaddjevealgi.
– Buoremus vuohki mánáide oahpahit ruhtadili, lea addit mánáide ja nuoraide fásta lubmaruđaid maid ieža galget hálddašit. Čájehuvvo sahte ii geat ožžo lubmaruđa dárbbu mielde, eai oahppan ruđaid hálddašit. Dalán go nuorat ožžot fásta supmi ruđa, de oahppagohtet hálddašit ruđaid. Soaitá leat nu ahte sidjiide geaidda leamaš álkimus oažžut ruđa, dávjá dorvvastit kredihttakortii ja geavaheaddjevealgái, ja dat sáhttá nuoraid ruhtadili bilidit guhkes áigái, lohká Eliassen.
Skuvllas lea ruhtadilli šaddan deháláš fáddán, ja jus ruovttus lea heajos ruhtadilli, de soaitá leat buoremus ágga nuoramusaide oahppat hálddašit iežaset ruhtadili.
– Soaitá leat buoremus ruhtadili oahppu jus eai leat nu olu ruđat gieđaid gaskkas, lohká Davvi-Norgga Seastinbáŋku 1 geavaheaddjiekonoma Linda Tofteng Eliassen.
Dás gávnnat iskama: kbnn.no.
