Viessobáŋku lea bivdán veahki Norgga gávpot- ja regiovdnadutkaninstituhtas lohkat gallis Norggas leat geain ii leat orrunbáiki. Sii leat maid bivdán veahki stáda- ja suohkanásahusain lohkamii, mii galgá dáhpáhuvvat 48. vahkku.
Viessobáŋku lea bivdán veahki Norgga gávpot- ja regiovdnadutkaninstituhtas lohkat gallis Norggas leat geain ii leat orrunbáiki. Sii leat maid bivdán veahki stáda- ja suohkanásahusain lohkamii, mii galgá dáhpáhuvvat 48. vahkku.
Lea njeallje jagi áigi go maŋemuš lohke dán, ja dalle ledje 6 259 olbmo geain ii lean orrunbáiki. Viessobáŋkku regiovdnadirektevra Guri Bergo vuordá dán jagi loguid.
– Mii fertet geahččalit láhčit dili nu ahte olbmot eai geava dan dillái ahte ii leat orrunbáiki, go mii diehtit man lossat dat lea olbmuide, ja movt dat sáhttá billistit olbmo eallima ja ovdánahttinvejolašvuođaid, lohká Bergo.
Dárbbašit veahki
Maŋemus lohkamis, mii lei 2012:s, čájehuvvui ahte ledje 20 proseantta sis geain ii lean orrunsadji geaidda fáhkka bođii dat váttisvuohta. 30 proseantta lei máŋgii vásihan ahte ii lean orrunsadji.
Máŋgasat bártidedje gárrenmirkkuiguin, ja psyhkalaš váttuiguin. Jus galgá das oažžut divššu, ja beassat viidásit eallimis, de dárbbašuvvo orrunbáiki, čállá Viessobáŋku.
Lohkan dáhpáhuvvá skábmamánu ja juovlamánu mánnomolsašumis. Lea Norgga gávpot- ja regiovdnadutkaninstituhtta mii čađaha kártema.
– Vai kárten galgá addit duohta gova dilálašvuođas, de dárbbašit veahki sis geat dihtet olbmuid geain ii leat stabiila, oadjebas ja buorre orrundilálašvuohta, lohká Bergo.
Danne lea Viessobáŋku bivdán veahki suohkana, stáda ja priváhta ásahusain oažžut oktavuođa singuin geain ii leat orrunbáiki.
Eai dušše sii geat olgun ođđet
Eai leat dušše sii geat orrot olgun geat lohkkojit orrunbáikki haga, leat maid sii geain ii leat báiki gos ođđet boahtte ija, dahje sii geat orrot bearraša dahje oahppásiid luhtte gaskaboddosaččat.
Maiddái sii geat galget beassat giddagasas dahje institušuvnnain guovtti mánu sisa rehkenastojuvvojit orrunbáikki haga. Dát váttisvuohta maid ii leat dušše stuora gávpogiin nu go ipmirduvvo.
Unna suohkanaččain leat maid dákkár váttisvuođat.
– Mii ávžžuhit suohkaniid leahkit hui dárkilin go čađahit lohkamiid, vai ožžot buori gova hástalusain.
Stabiila logut
Lohkamat leat čađahuvvon viđa háve ovdal, ja dat addet buori gova dan maŋemuš 20 jagi dilálašvuođas.
Lea čájehuvvon ahte logut leat oalle stabiilat leamaš, vaikko olmmošlohku lassána. Ránnjáriikkain lea nuppe ládje, go doppe leat logut lassánan hirbmosit.
– Muhto nu guhká go gávdnojit olbmot geain ii leat orrunbáiki, de ii leat ágga leahkit duhtavažžan, loahpaha Viessobáŋkku regiovdnadirektevra.
