Veahkehit hutkat mo čalmmustahttit psyhkalaš dearvvašvuođa máilmmibeaivvi 

Mental Helse lágida inspirašuvdnasemináraid miehtá Norgga maid ulbmilin lea veahkehit hutkat mo báikkálaš dásis sáhttá čalmmustahttit psyhkalaš dearvvašvuođa

Psyhkalaš dearvvašvuođa Máilmmibeaivi lea dán jagi golggománu 10. beaivvi.

Dán jagi fáddá lea eastadit iešsorbmemiid.  

Dan oktavuođas lágida Mental Helse, mii koordinere máilmmi psyhkalaš dearvvašvuođabeaivvi Norggas, inspirašuvdnasemináraid miehtá Norgga.

Lágideaddjit čilgejit iežaset ruovttusiiddus ahte semináraid ulbmil lea juohkit dieđuid dán jagi váldofáttá birra ja addit rávvagiid mo báikkálaš dásis sáhttá čalmmustahttit fáttá ja máilmmibeaivvi.
 

27 jagi čalmmustahttán miehtá máilmmi
Dán jagi lea 27. jahki go dan beaivvi čalmmustahttet miehtá máilmmi.

Ulbmilin lea álggu rájes leamašan fuomášuhttit mii psyhkalaš dearvvašvuohta lea, hávkadit ovdagáttuid ja oažžut servodaga rahpaseappot hupmat dán fáttá birra.

Seminára lágiduvvo Davvi-Norggas dáin báikkiin:
Romssas, njukčamánu 13. beaivvi
Álttás, njukčamánu 14. beavvi
Båddojos, coŋománu 10. beaivvi.