Njealjis logi olbmos árvvoštallet geahpedit lieggasa dálus seastin dihtii elrávnnji. Dáhkádusfitnodagat váruhit dan dahkamis go čáhci sáhttá galbmot ja gártá hirbmat divrrasin čáhcevahágiid divvut.
– Ruovdibuollašat ja elrávdnjeseastin eai heive oktii. Jus dus ii leat doarvái liekkas ja čáhci galbmo, de lea riska ahte dáhkádus ii govčča buot goluid, lohká Sparebank 1 ja DNB dáhkádusfitnodaga Fremtind vaháteastadeaddji Therese Hofstad-Nielsen preassadieđáhusas.
Iskkadeamis, man Respons Analyse dagai Fremtind ovddas ovdal juovllaid, vástidedje 41 proseantta dahje birrasii 1,7 miljovnna norgalačča, ahte árvvoštalle geahpedit lieggasa dálus seastin dihtii ruđaid. 12 proseantta dahje birrasii 500 000 norgalačča árvvoštalle dan dahkat maiddái iežaset barttas.
Juohke jagi mákset dáhkádusfitnodagat olu ruđaid luoddanan čáhcerevrriid ja čáhcevahágiid geažil. Jagi 2022 ja 2023 ledje badjel duháha čáhcevahága dáluin ja barttain. Dán dálvvi vurdet sii dan logu lassánit.
– Diimmá rájes lea čáhcevahágat barttain beliin lassánan. Jáhkkimis lea diimmá divrras elrávdnji dagahan ahte bartaeaiggádat leat geahpedan lieggasa eambbo go livčče galgan, lohká Hofstad-Nielsen.
Son muittuha ahte ferte leat dan mađe liekkas juohke lanjas ahte dállu ii galbmo oalát. Lohká berret rehkenastit 60-70 watt juohke njealjehasmehterii ja ruovdebuolašin 70-85 watt juohke njealjádasmehterii. Son rávve bidjat lávgadasa birra uvssaid ja klásaid. Muđui rávve son barttaid dálvvi láhkai fuolahit.
