LO Stáhta ja Spekter jukse mannan ija ovttaoaivilvuođa daid guovddáššiehtadallamiin mat gusket Spekter-guovllu 55 000 miellahttui.
Oppalaš lasáhus lea 13 650 kruvnna jahkásaččat buohkaide. Lasáhusat lea brutto ja biddjojuvvot fápmui cuoŋománu vuosttaš beaivvi 2024. Sis geas lea oasseáiggevirggi ožžot lasáhusa virggi sturrodaga ektui.
– Olusat vásihit sis lea heajut ekonomiija, ja buoret oastinnákca lea dehálamos dán jagi bálkášiehtadallamis, lohká LO stáhta nubbijođiheaddji ja šiehtadallanjođiheaddji Lise Olsen preassadieđáhusas.
Son ávžžuha maid luohttámušolbmuid vuoruhit sin geain lea unnimus bálká bargoaddisearvvi Spekter doaimmain.
Bálkášiehtadallan lea maid nu mo ledje soahpan, ahte lei bálkášiehtadallan priváhta suorggis gaskal LO ja NHO man rámma šattai 5,2 proseantta.
Dál álggahuvvojit báikkálaš bálkášiehtadallamat fitnodagain. Spiehkasteapmi lea dearvvašvuođa suorgi mii álggaha guovddáš šiehtadallamii miessemánu nuppi beaivvi. Báikkálaš bálkášiehtadallamiid áigemearri lea miessemánu goalmmát beaivi. Spiehkasteapmi lea guovlu 6 NRK man áigemearri lea 25.04 ja guovlu 1 man áigemearri lea 08.05. Guovlu 5 VY Buss šiehtadallá ovttasráđiid Bussesuorggisoahppamušain.
Dán jagáš bálkášiehtadallamat leat maid váldošiehtadallamat. Earret bálkášiehtadallamat, de šiehtadallo maid mii galgá leat soahpamuša teaksta.
