-Almmuhus-
OĐĐASATTroms Kraft almmuha dál dieđuid sáme­gillii maid

Troms Kraft almmuha dál dieđuid sáme­gillii maid

-

-

Sámedikkis ja Troms Kraftas lea giellaprošeaktaovttasbargu mas dál oaidná bohtosiid.

Troms Kraft dieđiha preassadieđáhusas ahte sin ruovttusiidu lea dál almmuhuvvon sámegillii maid.

– Leat hirbmat ilus go dál leat dása olahan – dál lei áigi. Romssa álbmot oamasta Troms Krafta, álbmot geaid gaskkas hállet sihke dárogiela ja sámegiela. Vaikke eatnašat máhttet dárogiela, de lea min ulbmil láhčit dili nu bures go vejolaš gulahallat sámegilliige, dadjá Stein-Gunnar Bondevik, Troms Kraft servodatgulahallanolmmoš preassadieđáhusas.

Ovttasbargu Sámedikkiin álggahuvvui maŋŋel go Troms Kraft Nett ja Nordlansnett el-fierpmádatfitnodagat ovttastahttojuvvojedje, ja ođđa fitnodahkii válljejuvvui sámegiel namma «Arva». Ovttasbargu ii guoskka dušše gillii, muhto rávvesta maid movt elfápmofitnodat galgá dás ovddasguvlui ovttasdoaibmat sámi servodagain.

– Lei dehálaš ahte dát geavai ávddalaččat. Ii sáhte bidjalit el-fierpmádatfitnodahkii sámi nama sahtedohko. Danne leat hirbmat movttegat go Sámediggi mieđai dán ovttasbargui minguin, dadjá Bondevik.

Kundarat galget sáhttit sámegiela hupmat

Preassadieđáhusas dieđihit ahte dárogiel- ja sámegielsiiddut eai šatta juste ovttaláganat, muhto mávssolaš dieđut galget maiddái gávdnot sámegillii. 

– Dasa lassin lea Troms Kraft-konseardna láhčimin dili nu ahte kundariidda sáhttá vástidit sámegillii. Šiehtadusain Sámedikkiin lea ulbmil maiddái ráhkadit luoddakártta buori, jotkkolaš gulahallamii gaskal energiijafitnodaga ja sámi servodaga, čállo preassadieđáhusas. 

Sámediggi sávvá eará fitnodagaid dahkat seamma

– Sámedikkis lea celkojuvvon ulbmil oažžut sámegiela oinnolaččabun Norggas. Danne lei midjiide lunddolaš searvat ovttasbargui, go okta riikaoasi stuorámus fitnodagain dáhtui geavahit sámegiel fitnodatnama. Jáhkkit ja sávvat ahte dát prošeakta bijašii málle eará fitnodagaide mo geavahit sámegiela iežaset profileremis, ja eanebut galggašedje dieđus dahkat nu go Troms Kraft. Dán galgá datte vuđolaččat dahkat ja sámi kultuvrra gudnejahttimiin, dadjá Sámedikki giellasuorggi sámediggeráđđi, Mikkel Eskil Mikkelsen.

Dál lea dušše váldofitnodat Troms Kraft daid ođđa siidduid almmuhan. Arva ja Ishavskraft almmuhit viggamušaideaset maŋŋel.

-Almmuhus-