El-čiekčansihkkeliidda lea beroštupmi lassánan ja máŋggas trimmejit daid, Trygg Trafikk dovdá ahte fertejit addit váruhusa olbmuide.
– Dat ii gávdno jierpmálaš dárbu dasa. Stivret ovtta el-čiekčansihkkela 20 km/d leavttus lea doarvái leaktu eatnasiid mielas, dadjá Trygg Trafikk seniorráđđeaddi Bård Morten Johansen preassadieđáhusas.
Trimmen mearkkaša ahte váiduda mohtora nu ahte oažžu eanet leavttu.
111 olbmo roasmmohuvvan
Geassemánus roasmmohuvve 111 olbmo go geavahedje el-čiekčansihkkela. Oktiibuot leat dan golmma ja bealle maŋimuš mánus, cuoŋománus, miessemánus, geassemánus ja suoidnemánus beallemuddui, 258 olbmo roasmmohuvvan.
Ealáskahttá debáhta Eurohpá stuorragávpogiin
Máŋga stuorragávpoga Eurohpás leat daid maŋimuš áiggiid čavgen njuolggadusaid el-čiekčansihkkeliid geavaheamis.
Københámmánis leat gieskat ráhkadan njuolggadusa ahte ahkemearri vuodjit ollesolbmo haga lea 15 jagi.
Dasa lassin lea lohpi dušše ovtta olbmos leat ovtta el-čiekčansihkkela alde, ja ii leat lohpi vuodjit váccáhagas.
Maiddái Ruoŧas leat digáštallamat ásahit njuolggadusaid el-čiekčansihkkeliid geavaheapmái maŋŋá go okta 27 jahkásaš almmái jámii go el-čiekčansihkkeliin beaškkihii biillain.
