Dán rádjái dán jagi leat 113 olbmo duššan johtolagas, ja sáhttá šaddat alimus lohku 2016 rájes. – Lea balddihahtti ovdáneapmi, oaivvilda Trygg Trafikk.
Maŋŋel go olu jagiid lea leamaš njiedjan duššamiin johtolagas, de sáhttá dál šaddat nubbi jahki go lohku lassána.
– Mii leat boasttu guvlui jođus dál jus mihttu lea ahte ii oktage galgga duššat dahje garrasit roasmmehuvvat johtolagas. Lea hoahppu jorgalahttit dan ovdáneami. Ii leat dohkálaš ahte mii sáhttit oažžut goargŋuma nuppi jagi juo. Dasa lassin oaidnit mii dán jagi ahte eambbo nuorra olbmot duššet johtolagas, ja dat lea balddihahtti. Lea duođalaš servodatváttisvuohta go johtolagas duššet eambbo go 100 olbmo jahkásaččat, dadjá Trygg Trafikk fágadirektevra Tanja Loftsgarden preassadieđáhusas.
Váilevaš vuodjinčehppodat lea dávjá okta sivva
Dán mánu almmuhii Stáda Geaidnodoaimmahat iežaset jahkásaš analysa diimmá jápminlihkohisvuođain. Dat čájeha mat leat váikkuhan juohke jápminlihkohisvuhtii.
– Geaidnodoaimmahaga analysa addá dehálaš gelbbolašvuođa eastadan dihte duođalaš johtolatlihkohisvuođaid. 2022:s lei vuoddji boasttuvuohta okta sivain lihkohisvuhtii. Johtaleaddjit sáhttet ieža dahkat olu buoridit sihkarvuođa. Danne fertejit eiseválddit ja mii bargat váikkuhit dan. Mii háliidit ahte buohkat váldet oadjebas válggaid johtolagas, dadjá Loftsgarden.
Beare oallugat girddihit ja vudjet gárrenoaivvis
Leat álo olu sivat manne lihkohisvuohta geavvá. 2022:s lei gárrenoaivvevuodjin ja beare alla leahttu sivvan measta beali dain jápminlihkohisvuođain.
– Sii geat iešdáhtus rihkkot njuolggadusaid go girddihit dahje go vudjet gárrenoaivvis, fertejit bissehuvvot go dávjjit dárkkista johtolaga. Politiijain fertejit doarvái resurssat vai láhkarihkkun johtolagas sáhttá vuoruhuvvot. Dasa lassin ferte boahtit garrasit reguleren ja ođđa ráŋggáštanreakšuvnnat. Vejolašvuohta duoguštit fievrruid ja geavahit álkoholalása promilladubmehallajeddjiide, ovdamearkka dihte. Mii fertet maid ain bargat eastademiin kampánjjaiguin ja diehtojuohkimiin johtaleddjiide, loahpaha Loftsgarden.
