-Almmuhus-
OĐĐASAT100 olbmo duššan johto­lagas dán rádjái dán jagi

100 olbmo duššan johto­lagas dán rádjái dán jagi

Journalista

-

-

19 olbmo dušše johtolagas čakčamánu. Nu šattai čakčamánnu dán jagi vearrámus lihkohisvuođamánnun dán rádjái dán jagi. 

Oktiibuot leat 100 olbmo duššan johtolagas, mii lea 11 eambbo go diibmá seamma áiggi.

Dat alla duššanlogut johtolagas geasi rájes orrot ain joatkime. Leat ain vuollel 15 jahkásaš  mánát ja nuorat geat dagahit dan lassáneami.

– Čuohcá midjiide vel garraseappot go mii čakčamánus massiimet golbma nuorra olbmo ovtta ja seamma lihkohisvuođas, ja ovtta nuorra bártni sihkkeliin. Dakkár lihkohisvuođaid mii fertet nagodit garvit. Mis leat leamaš doarvái guoros skuvlabeavddit ja bargoustibat geat váillahit iežaset bargoskihpáriid dán jagi. Vai buohkat galggaše oadjebasat joavdat gosa leat jođus, de fertejit sihke servodat ja ovttaskas olbmot áŋgiruššat. Dan sáhttá dahkat go vuolida leahttoráđiid muhtun báikkiin, ja ahte mii johtaleaddjit čuovvut njuolggadusaid ja leat áicilat johtolagas, dadjá Trygg Trafikk fágahoavda Bård Morten Johansen preassadieđáhusas.

Guokte «kriisajagi» maŋŋalagá

Diimmáš gohčoduvvo «kriisajahkin» johtolatsihkarvuođas. Dán jagi lea vel vearrát. 

– Norga lea olu jagiid nammaduvvon Eurohpás  riikan mas lea sihkkareamos johtolat, ja mis lea leamaš mearkkašahtti njiedjan johtolatduššamiin guhkit áiggi. Mii eat sáhte heaitit dainna, ja leat biddjon čielga mihtut unnidit duššanloguid. Dál mii leat njulgestaga oktiibeaškkihandásis, ja eiseválddit fertejit doaimmaid bidjat johtui jorgalahttit dan treandda. Vuolidit leahttorájiid, eambbo ruđa dárkkisteapmái ja eambbo áŋgiruššama eastadanbargui árrat juo, leat evttohusat doaibmabijuide mat berrejit vuoruhuvvot, dadjá Johansen.

-Almmuhus-