Čakčamánu 14. beaivvi lea vejolaš gullat vihtta iešguđet davviguovlluid eamiálbmotjienaid konsearttas «The Secret in Our Voice» Riikalávddis Oslos.
Dán konsearttas deaivvada Transjoik jazza/ World-njealjeolbmo joavkku man njunušolmmoš lea máttasápmelaš Frode Fjellheim vihtta erenoamáš davviguovlluid eamiálbmot vokála musihkkaárbevieruin. Riikalávddi lágideaddjit lohket dás besset guldaleaddjit oahpásmuvvat mo dát jietnageavaheaddjit geavahit iežaset jienaid. Earret eará lea máilmmibeakkán čottalávlu Radik Tyulyush, gii ovddasta Huun-Huur-Tu ja lea eret Tuva guovllus, Yuliyana Krivoshapkina, gii lea eret Sakha/Yakutsia, sápmelaš Ulla Pirttijärvi ja Amaly Sallualuk ja Akinisie Sivuarapik geat guktot leaba eret Quebec guovllus, bovdejuvvon. Konsearttas lea vejolaš oahpásmuvvat dáid jietnaárbevieruide čottalávlagis, luđiide ja luondduáddestallamii.
Duohtavuođa- ja soabahanlávdegotti geassemánu almmuhuvvon raporta čájeha ahte ii leat diehttelas ahte dát jietnaárbevierut leat seilon, go buot dát joavkkut leat rahčan doalahit iežaset giela, guovlluid ja riggodagaid ja fertejit ain rahčat dan ovddas.
