-Almmuhus-
-Almmuhus-
OĐĐASATStáhtaráđđi mieđiha vuhtii váldit NBR ja Sámedikki láhkabarggu

Stáhtaráđđi mieđiha vuhtii váldit NBR ja Sámedikki láhkabarggu

-

-

Eanadoallodepartemeantta stáhtačálli Widat Skogan lohká stáhtaráđi vuhtii váldit Sámedikki ja NBR sávaldaga geahčadit ollislaččat Boazodoallolága rievdademiid maid Stuorradiggi ii leat meannudan.

Ráđđehus almmuhii diibmá iežaset boazodoallopolitihka man Stuorradiggi dohkkehii, mas evtto­hit rievdademiid boazodoaloláhkii earret eará ulbmilparagráfa, bákkus bealljeklipssain merkegoahtit bohccuid ja nammadit boazodoallostivrii čieža lahttu.

Ášši sáddejuvvui gulaskuddamii ja sihke Sámediggi, Norgga Boazosápmelaččaid Riikasearvi (NBR), ja boazoealáhus leat moaitán dan.

– Ráđđehus lea árvvoštallan 2007:i boazodoallolága mii lea oalle ođas, ahte ii dárbbašivčče dan ollásit geahčadit. Muhto leat dasa dahkkon rievdadusat ja mii leat ožžon čielga dieđu Sámedikkis ahte háliidit ollislaččat geahčadit boazodoallolága. Mii váldit vuhtii Sámedikki ja NBR barggu ja geahččalat maŋidit ođđa láhkarievdademiid dassážii go Sámediggi lea geargan dainna bargguin. Dalle hálan daid ođđa rievdademiid birra, mat eai leamaš gulaskuddamis ja maid Stuorradiggi lea meannudan, čilge Eanadoallo- ja Biebmodepartemeantta stáhtačálli Widar Skogan, gii ovddasta Romssa Kristtalaš Álbmotbellodaga Stuorradikkis.

Dát mearkkaša ahte láhkarievdadeamit mat gusket ulbmilparagráfii, bealljeklipsaide ja boazodoallostivrii eai maŋiduvvo gal.

Dadjá sin bealis lea miellagiddevaš oaidnit mo láhkabargu šaddá. 

Stáhtačálli Skogan deattuha ahte stáhtaráđđi háliida buori ovttasbarggu Sámedikkiin.

 

Boazodoallostivra ii leat ollislaš

Eanadoallo- ja Biebmodepartemeantta stáhtačálli Widar Skogan čilge ahte lea dárbu ahte boazodoallostivrras leat čieža miellahtu, njeallje lahttu maid stáhta nammada ja golbma maid Sámediggi nammada.

Dasa ii leat Sámediggi leamaš nu mielas, go ii leat nammadan golbma lahtu. 

– Dálá láhka gáibida čieža lahtu. Mii leat ožžon čielga dieđu ahte jođiheaddjis berre leat boazodoallofágalaš gelbbolašvuohta ja lassin hálddašangelbbolašvuohta go dát leat hálddašanstivra. Dán ášši birra vuordit mii ahte stáhtaráđđi ja sámediggepresideanta hálešteaba. Lea dehálaš ráđđehussii ahte boazodoallostivrras leat doarvái lahtut geain lea boazodoallofágalaš máhttu. Mii leat gergosat digaštallat Sámedikkiin dan birra, joatká stáhtačálli Skogan.

 

Bealljemearka bistá 

– Dálá mearkkat galget jotkojuvvot nu mo árbevirolaččat leat dahkkon. Stáhtaráđđi ii áiggo dan rievdadit. Dat lea čielggas. Muhto juohke bohccos galgá leat binna bánna elektrovnnalaš mearka, dan gáibida láhka. Boazodoallit, geat geavahit dán mearkka, lohket sii leat duhtavaččat mo dat doaibmá, ja ahte sis lea ávki das go hálddašit iežaset ealu, lohká stáhtačálli Widar Skogan várrugasat. 

Muhto lohká son eaktuda ahte Stuorradiggi meannuda ja mearrida dan vuos ja dasto sáhttet sii digaštallat ealáhusain mo dan váldá atnui

 

Illudahtti ságat

Sámedikki ráđđelahttu Silje Karine Muotka mielas leat stáhtačálli Widar Skoganis movttiidahtti ságat.

– Lea illudahtti ahte áigu vuhtii váldit Sámedikki ja NBR. Mii mu mielas lea vuogas ja buorre go árvvoštallat dan. Dat gal lea oalle positiiva. Illudan beassat suinna čoahkkinastit. Plána mielde várra boahtte vahkus, lohká Sámedikki ráđđelahttu Silje Karine Muotka.

-Almmuhus-