Riddu Riđđu eamiálbmotfestivála luoitá odne guokte nama geasi festiválii. Mearrasámi elektronikaartista Niilas ja finnmárkulaččat Pil & Bue galget čuojahit váldolávddis.
– Peder Niilas Tårnesvik lea okta dain buot gelddoleamos elektronikaartisttain ja -buvttadeddjiin mat mis leat Norggas. Gieskat čuojahii Dronnet Sonja ovddas, ja dál máhccá máttuidis guvlui, Gáivutnii, addit Riddu Riđđu-álbmogii rojála vásáhusa, čállá Riddu Riđđu preassadieđáhusas.
Ožžon birccus guđežiid
«Also This Will Change» nammasaš skearru vuostáiváldui hui buriid árvvoštallamiiguin Aftenpostenis ja Bergens Tidendes, goappašagaid birccut vuosehedje 6. Son vuittii maiddái Spellemannas dán jagi elektronika-bálkkašumi skearruinis mainna gárttai áibbas akto bargat, go massii iežas managementa korona geažil.
Riddu Riđđu čállá Niilas lea hárvenaš belljes bienaide, ja son seaguha šáŋŋeriid, dovddahemiid ja musihkalaš dovdduid su áibbas iežas jietnaduovdagis. Son atná gieddebáddemiid, samplesiid, live- ja digitála čuojanasaid, ja goaikkanasaid sámi duogážisttis, hábmet šealggáhalli jietnajoga.
Heavyrock seahkas
Joavku Pil & Bue boahtá Finnmárkkus Riddu Riđđui, ja sis lea garrarocka seahkas. Joavku almmuhii skearru «The world is a rabbit hole» 2021:s, maŋŋá moatti jagi bottu.
– Sin jietnaeanadagat mas leat fierri ritmmalaš minstarat, referánssat postrockii, soddji fámolašvuohta ja áđat hearkivuođas ja eahpedoaivagis oaččui árvvoštalliid ohcat daid alimus árvosániid. Duo gal eaba dieinna duđa, leaba baicce bádden jo ođđa skearru mii vuordimis almmuhuvvo skábmamánus 2022. Eamiálbmotfestivála bivdá gussiid ráhkkanit konsertii ovttain Norgga garraseamos, barggáneamos og árjjaleamos live-joavkkuin, čállá lágideaddji.
Stuora namat
Riddu Riđđu čállá sis lea gelddolaš prográmma moanat stuora namaiguin.
– Afrihká njunuš diva ja Grammy Awardsa vihttagearddevuoiti, Angelique Kidjo, čuojaha lávvordaga 16.7. Riddu-álbmoga jiellat, The Halluci Nation, čuojaha eahkeda ovdal. Eatnasat dovdet sin ovddeš namaineaset, A Tribe Called Red.
Festiválajođiheaddji Sandra Márjá West illuda maŋemus festiválasis.
– Šaddá hirbmat somá lágidit ollislaš festivála fas. Lean hui rámis min prográmmain, mis leat stuora namat ja gelddolaš ođđa gávdnosat, čállá son.
