Son gii dán vuoru oažžu juovlafuomášumi lea olmmoš gean evttoheaddji čilge váibmoláđis, movttegis ja utnolaš olmmožin.
Ávvir lea bivdán lohkkiid sáddet evttohusaid geaidda galggašii addot veaháš fuomášupmi ovdal juovllaid. Mii ohcat olbmo gii buktá moji ja ilu, juogo bargosajis dahje astoáiggis. Mii ohcat árgabeaisáŋgáriid. Elen Anne Grete Sara muitala olbmo birra su birrasis gii ánssáša fuomášumi:
– Mun sávan addit fuomášumi Sol Sirii. Son lea hui váibmoláđis sihke olbmuiguin ja elliiguin. Son veahkeha nuorra olbmuid ja, skeŋke biktasiid ja dávviriid jus oaidná muhtumis lea heajos ráđđi. Maŋemus attii ovtta nuorra oktoeadnái guokte seahka biktasiid, ja vel áigu doalvut uvjajáhka go sus ii leat ráđđi oastit. Son dárbbaša vai bivvá mánnávovnnain olgun vázzit. Son veahkeha maid elliidorganisašuvnnaid. Son maiddái hupmá Vlog:s mentála dearvvašvuođa birra iežas snap-kanálas. Son addá maid vuoktahábmen- ja vuoidanrávvagiid nuvttá. Son veahkeha olbmuid movt sii ožžot buoret iešdovddu, čállá Elen Anne Grete Sara ja lasiha vel ahte Sol lea vel hui movttet ja utnolaš.
Addá munnje nu olu|
Sol Siri jávohuvvá go muitalit maid Elen Anne Grete Sara čállá su birra.
– In dieđe maid galggan dadjat, dál gal njuorasmuvven. Ledje nu fiinna sánit, lohká Sol.
Go veaháš jurdila, de mieđiha ahte dovdá iežas nie mo Elen Anne Grete čilge.
– Juo, mun lean dakkár olmmoš gii smiehtan earáid birra. Mun maid beroštan elliin, ja láven máŋgii jagis addit ruhtadoarjaga bussá- ja beanaorganisašuvnnaide. Leat olu olbmot geat rahčet ja munnje addá nu buori dovddu váibmui, lohká Sol Siri.
Sol Siri hupmá maid olu psyhkalaš dearvvašvuođa birra Snapchatas.
– Mun human olu maid iežan birra, iežan eallima birra ja mo mun dagan ja čoavddán áššiid, lohká Sol Siri vel ja giitá váimmolaččat fuomášumi ovddas.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivččii juovlafuomášumi.
