Son gii dán vuoru oažžu juovlafuomášumi, lea evttohuvvon go lea earenoamáš áŋgir hutkat nuoraide kulturdoaimmaid.
Ávvir lea bivdán lohkkiid sáddet evttohusaid geaidda galggašii addit veaháš fuomášupmi ovdal juovllaid. Mii ohcat olbmo gii buktá moji ja ilu, juogo bargosajis dahje astoáiggis. Mii ohcat árgabeaisáŋgáriid. Inger Marie Nilut lea árvalan Davvi Divisiona nuppi vuođđudeaddjái Anthoni Hættai addit juovlafuomášumi.
– Son lea álohii hutkame juoidá fálaldahkan nuoraide. Sus leat ollu jurdagat ja lea áŋgir ohcat ruđaid ja čađahit doaimmaid nuoraide. Kultureallin Guovdageainnus livččii ollu jaskadeabbo Anthoni haga, čállá son.
In livčče okto gal nagodan
Anthoni illosa dieđusge čáppa sániid ovddas, ja dadjala ovttatmano ahte son juogada dán fuomášumi iežas bargoustibiiguin, Davvi Divsiona nuppiin vuođđudeddjiin, Anna Katri Helanderiin ja musihkkáriin Inger Johanne Oskaliin, gii lea olu bargan sudnuin fárrolaga.
– Mun in livčče nagodan maidege čađahit jus eaba livčče mu lagas bargoguoimmit leamaš mielde lágideame measta juohke áidna kulturdáhpáhusa mas lean bargan dáppe. Juogadan sudnuin čuođi proseantta, dadjá Anthoni.
Háliida ovddidit lagasbirrasa
Son lohká ahte musihkka lea su eallimis hui dehálaš, ja su mielas lea hui mávssolaš lagasbirrasii beassat dan ovddidit.
– Mus ja mis lea hui stuora dárbu addit ruovttoluotta servodahkii, ja min váldomovitašuvdna lea nagodit doallat min unna servodagaža kultureallima heakkas, go jus kultureallin ii gávdno, šaddá servodat ránis ja láittas. Mii háliidit ahte galgá leat ealas ja vai olbmot loktet bures áiggi dáppe, dadjá Anthoni.
Davvi Division, mii lea álggahuvvon 2,5 jagi áigi, lea kulturstudio gos lágidit konsearttat, bargobájiid, fállet musihkka ja dánsundánsundiimmuid ja eará prošeavttaid. Maŋemus juovlakonsearttas Guovdageainnus dinejedje bileahtaiguin ruđa man ovddas leat juo diŋgon bandarusttegiid ja čuojanasaid Guovdageainnu skuvlii.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivččii juovlafuomášumi.
