Ávvir lea dáhtton olbmuid evttohit árgabeaisáŋgariid, geat ánssášivčče juovlafuomášumi. Lisbeth Myrskog čállá ahte Piera Mosebakken ánssáša oažžut dakkár fuomášumi.
Kárášjohkalaš Lisbeth Myrskog lea čuovvolan Ávvira ávžžuhusa ja lea evttohan Piera Mosebakkena oažžut dán juovlafuomášumi.
Son čállá: «Fuomášumi gal ánssáša Piera Mosebakken. Ii gávdno Sámis dákkár áŋgiris ja veahkkás olmmoš, nu váibmoláđis ja berošteaddji. Dearvvuođat buohkain Sámis.»
Piera giitá čábbát. Ii leat árgabeaivvi dáhpáhus ahte son oažžu skeaŋkka. Son han láve olbmuid veahkehit duon dán láhkai, čoaggit ruđaid iešguđet láhkai ja oastit ja addit borramušaid sidjiide geain ii leat nu buorre dilli.
– Lei somá oažžut. Dat addá dieđu munnje ahte doppe leat olbmot geat oidnet mu ja dat lea hui somá, lohká Piera Mosebakken.
Son sihkasta bivastaga eret gállus go aiddo lea geargan čorget šiljus gitta geidnui eret muohttaga.
– Dovddan dárbbu veahkehit
Lea dovddus ášši ahte Piera Mosebakken veahkeha birra jagi sin geat birgejit fuonemusat servodagas nu go «Kameratene». Erenoamážit juovllaid áiggi oaidná son ahte olbmot dárbbašit veahki, eai dušše borramuššii, muhto maid nuppi olbmui go rahčet oktonasvuođain go láittastuvvet okto.
– Láven gaskkustit duon dán dávvira sidjiide geat daid dárbbašit, muitala son.
Moatti jagi áiggi dihkkádii Piera bálgá Háldi várrečohkkii mii lea davábealde Kárášjoga márkana, vai olbmot dádjadit dohko. Muitala Háldi čohka alde lea trigonometralaš ruovdegalba maid olbmot leat čállán iežaset nama. Nu son fuomášii bidjat poastakássa ja girjjáža masa olbmot sáhttet čállit namaset, dan sadjái go dan ruovdegalbii.
– Dovddan dárbbu earáid veahkehit. Mun liikon olbmuid veahkehit ja dat lea munnje miellagiddevaš. Dat addá munnje buori oamedovddu, lohká Piera Mosebakken.
