Oktiibuot lea golmma olbmos duođaštuvvon koronavirus ja buohkain lea čanastupmi seamma mánáidgárdái.
Miessemánu 16. beaivvi duođaštuvvui vuosttaš koronanjoammun Snåases.
– Covid-19 lea duođaštuvvon muhtin Vinjebakken mánáidgárdebargis, geas maid lea čanastupmi Snåase skuvlla 10.luohkái, čállá suohkan iežaset neahttasiidduin.
Ikte duođaštuvvui vel guovtti olbmos koronavirus.
– Miessemánu 17. beaivvi leat čađahan birrasii 200 koronaiskosa, bealli dain leat jođánisiskosat mat čájehit ahte vel guovtti olbmos lea koronavirus. Sudnos lea maid čanastupmi Vinjebakken mánáidgárdái. Guovttis koronabuhcciin gullaba 18-64 ahkeluohkkái ja goalmmát lea vuollel 18-jahkásaš, dieđiha Snåase suohkan.
Gitta mánáidgárdi ja ruovttuskuvla
Vinjebakken mánáidgárdi lea giddejuvvon maŋŋel go koronanjoammun duođaštuvvui ja Snåase skuvllas ja Åarjel-saemiej skuvllas lea ruovttuoahpahus.
Suohkan lea guorragoahtán buot golbma koronanjoammuma, muhto eai dieđe vel gos dat lea njommon.
– Mii ávžžuhit olbmuid čuovvut nationála njoammuneastadanjuolggadusaid ja dasa lassin ávžžuhit olbmuid bissut ruovttusuohkanis jus ii leat dárbbašlaš johtit.