– Festivála manai hui bures ja geahččit ledje eanet go leimmet vuordán, muitala Aleksi Ahlakorpi.
Skábmagovat festivala lea máilmmi davimus eamiálbmogiid filbmafestivála, mii lágiduvvo jahkásaččat ođđajagimánu loahpas Anáris, 320 km davábealde poláragierddu.
Olgokinos sámi oanehisfilmmat
Dán jagi geasuhedje eanemusat ođđa sámi filmmat, maid ledje čohkken Sámiid Idja -boddui muohtateáhterii.
Das gehčče veaháš badjelaš 200 olbmo daid oanehisfilmmaid, nugo «Áfruvva»-filmma man Marja Helander ja Mauri Lähdesmäki leaba ráhkadan.
Nubbi filbma doppe lei Hans Pieskki ja Arttu Nieminena filbma «Muohtačalmmit/Snowfall», mas lei vel Suomas vuosttasčájáhus. Goalmmát lei «Háldi» man Ann Holmgren lea bagadallan.
Bivnnuheamos čájáhus mii čájehuvvui siste lei «Kolonialismma suoivva» -nammasaš čájáhus, mas 190 olbmo čuvvo Suvi West oanehisfilbmaráiddu.
Sáhttá ain geahččat filmmaid
Skábmagovat joatká neahta bokte čujuhusas skabmagovat.vhx.tv gitta Sámiálbmotbeaivvi rádjái.
– Bargojoavku giitá festivála gehččiid ja gussiid, filbmadahkkiid, artisttaid, ruhtadeaddjiid, ovttasbargoguimmiid, doarjaleddjiid, ságastalliid, loaiddasteaddjiid, láidesteaddjiid, eaktodáhtolaččaid, muohtahuksejeddjiid, SOGSAKK-studeanttaid ja Sámidáidaga doarjjasearvvi lahtuid, čalla Aleksi Ahlakorpi preassadieđáhusas.
