Norwegian girdi šattai mánnodaga botket mátkki Girkonjárggas Osloi ja seaivut Rovvenjárgii go mátkkošteaddji buohccái girdis.
Mánnodaga šattai okta Norwegian girdi, mii vulggii Girkonjárggas ja galggai Osloi, heahteseaivut Rovvenjárgii Supmii, go okta girdimátkkošteaddji buohccái. Ávvira dieđuid mielde galgá mátkkošeaddji leat njuoratmánná.
Válde vára
Norwegiana gulahallanráđđeaddi Tonje Næss duođašta Ávvirii ahte sis šattai girdi seaivut Roavvenjárgii. Son ii áiggo dadjat makkár olbmos lea sáhka, muhto lohká go seivo Supmii, de ledje dearvvašvuođabargit juo vuordime ambulansain.
– Mátkkošteaddjis válde vára dearvvašvuođabargit, ja mis eai leat dieđut su dili birra juste dál, lohká Næss.
Álo dramáhtalaš
Næss muitala girdi lea aiddo ollen Osloi, iige son leat vel gulahallan girdibargiiguin mii juste dáhpahuvai girdis. Son lohká lea goitge álo dramáhtalaš go olmmoš buohccá girddis.
– Lea álo dramáhtalaš dasa geasa guoská, ja mii Norwegiana bealis seaivut álohii vuosttaš ja lagamus seaivunšilljui go dákkár bárttit čuožžilit, go heagga ja dearvvašvuohta boahtá álo ovddemussii, lohká son.
