Davvi-Norgga stuorámus gávpogiid sátnejođiheaddjit dorjot Norwegiana Widerøe-oastima, man vuostá Gilvobearráigeahčču orro jienasteamen.
– Romssa, Bådåddjo, Rana, Hárštá ja Narviika gielddat leat fuolastuvvan dan geažil go gilvobearráigeahčču háliida bissehit Norwegiana oastimis Widerøe. Widerøe lea dehálaš doaibma olles Davvi-Norgii ja unna girdifitnodagažin stuora girdisuorggis rahpá Widerøe ođđa vejolašvuođaid dakkár industriijaeaiggádiin go Norwegian, čuožžu dáin namuhuvvon gávpogiid sátnejođiheddjiid oktasaš ávžžuhusas.
Norwegian almmuhii suoidnemánus ahte áigu oastit Widerøe, Norgga goalmmát stuorámus girdifitnodaga.
Gilvobearráigeahčču ballá ahte oastin sáhttá goaridit gilvvu Norgga girdinmárkanis. Danne sii leat dovddahan ahte sii baicce dorjot dan ahte hilgut oastima.
Ávžžuhusas čujuhit sátnejođiheaddjit ahte sidjiide lea dehálaš sihkkarastit buoremus vejolaš girdibálvalusaid hálbbimus lági mielde Davvi-Norgga ássiide ja ealáhusaide.
– Jus galgá viidáseappot ovddidit buriid ja hálbbes girdinfálaldagaid, de gáibiduvvo nana Widerøe, mii sáhttá ovdánit dakkár suorggis mii johtilit rievdá.
Maŋimuš áigemearri Gilvobearráigeahču loahpalaš loahppajurdagii lea ođđajagimánu 3. beaivve, muhto mearrádus sáhttá dahkkot ovdal dan.
(©NTB)
