Johtolatdepartemeanta árvala juolludit 18 doarjjaruhtaduvvon girdiruvtto Widerøe girdifitnodahkii.
Johtalusministtar Jon-Ivar Nygård (Bb) lohká preassadieđáhusas iežas leat duhtavažžan.
– Lean ilus go dáhttut juolludit daid girdiruvttuid. Dál mii sihkkarastit mátkkošteddjiide buoret ja hálbbit girdibileahtaid.
Widerøe lea vuoitán nu gohčoduvvon FOT-ruvttuid haddefálaldatgilvvu. Dat mearkkaša ahte Johtolatdepartemeanta dat oastá girdiruvttobálvalusaid sihkkarastin dihtii buriid fálaldagaid miehtá riikka.
FOT-ruvttuide álgá ođđa soahpamušáigodat cuoŋománu 1. beaivvi boahtte jagi. Johtolatdepartemeanta galgá máksit 2,35 miljárdda ruvnno operatevrraide hálddašit ruvttuid.
Ráđđehus lea ođđa šiehtadusain sihkkarastán dan ahte divraseamos bileahtta hálbu beliin.
– Mii leat hui ilus go midjiide juhke ruvttuid mat vel ledje báhcán. Dál sáhttit divvugoahtit ruvttotabeallaid daid rámmaid siskkobealde mat mis leat, dadjá Widerøe kommersiála direktevra Christian Skaug.
Earet eará juhkkojuvvojedje vuossárgga dát ruvttut:
* Ruvttut gaskal Girkonjárgga, Čáhcesullo, Várggáid, Báhcavuona, Bearalvági, Donjevuona, Honnesvági, Hámmerfeastta, Álttá ja Romssa.
* Ákŋoluokta – Romsa, Ákŋoluokta – Hámmerfeastta, Sørkjosen – Romsa.
