Ođđa SVT-ráiddus «Min story» muitalit nuorra sápmelaččat mot leat vásihan beaivválaš rasismma.
Lea Moa Frygell ja Sara Omma leaba ráhkadan tv-ráiddu mii lea oaidnimis SVT neahttasiiddus. Soai leaba gažadan nuorra sápmelaččaid beaivválaš rasismma birra. Muitaleaddjit leat beassan leat anonyma ja neavttárat Lene Cecilia Sparrok ja Paul Ol Jona Utsi leaba de neaktán ja muitalan nuoraid muitalusaid.
Leat olu beaivválaš dáhpáhusat maid neavttárat ovdanbuktiba njealji sámegillii. Prošeaktajođiheaddji Moa Frygell čilge ahte lea leamaš lossat gullat buot dáhpáhusaid beaivválaš rasismma birra.
– Dat čuohcá ja lea lossat gullat maid nuorra sápmelaččat leat šaddan vásihit ja gullat. Dát prošeakta lea boktán olu dovdduid, muitala son SVT artihkkalis.
Buot muitaleaddjit leat beassat leat anonyma ja Moa jáhkká ahte danin leat olusat duostan muitalit iežaset vásáhusaid birra.
– Sii leat muitalan duohtavuođa rehálaččat nu ahte eai leat dárbbašan ballat ahte šaddet vásihit maidege maŋŋel go ráidu lea almmuhuvvon.
