Sámiráđi jagi 2022 kulturdoarjagiid ohcanáigi lea rabas, ja nu sáhttá ohcat doarjagiid gitta golggotmánu 1. beaivve rádjái.
Sámiráđđi lea organisašuvdna mii doaibmá Norgga, Ruoŧa, Ruošša ja Suoma sámiid organisašuvnnaid oktasašbargoorgánan. Juohke jagi juolludit sii kulturdoarjagiid, ja dán jagáš ohcanáigi lea rahpasan.
– Sámiráđđi hásttuha ohcat 2022 jagi kulturdoarjagiid. Ovttaskas sápmelaččat, sámejoavkkut ja sámesearvvit sáhttet ohcat kulturdoarjaga juogo prošeaktadoarjjan, mátkestipeandan dahje bargostipeandan. Sámiráđđi doarju sihke árbevirolaš ja ođđaáigásaš kulturdoaimmaid, dieđiha Sámiráđđi preassadieđáhusa bokte.
Ohcanáigemearri lea bearjadaga golggotmánu 1. beaivve. Ohcamuša sáhttá elektrovnnalaš ohcanskovi bokte sáddet Sámiráđi neahttasiiddus.
