Sámiráđđi bivdá evttohusaid jagi 2024 girjjálašvuođabálkkašumi evttohassan. Dán jagi geigejuvvo bálkkašupmi mánáid- ja nuoraidgirjái.
– Girjjálašvuođabálkkašumi ulbmilin lea movttiidahttit olbmuid čállit sámegillii, man lassin dat buktá beaggima čálliide ja dahká sámi girjjálašvuođa dovddusin. Girjjálašvuođabálkkašupmi juhkkojuvvo vurrolagaid mánáid- ja nuoraidgirjái dahje rávesolbmuide oaivvilduvvon girjái. Jagi 2024 girjjálašvuođabálkkašupmi addojuvvo mánáid- ja nuoraidgirjái, čilge Sámiráđđi preassadieđáhusas.
Sámiráđđi bálkkaša sámegillii čállojuvvon čáppagirjjálašvuođagirjji. Bálkkašupmi ii addojuvvo eallingeardái dahje máinnasčoakkáldahkii. Girji galgá leat almmustahttojuvvon maŋimuš njealji jagis, gaskal 1.1.2020–31.12.2023. Girjji originálagiella galgá sámegiella. Bálkkašumi ii sáhte juohkit sámegillii jorgaluvvon girjjiide. Unnitlogu sámegielaid buohta sáhttet spiehkkasit originálagiela ektui, dasgo daidda gielaide almmustuvvet unnán girjjit.
Áigemearri sáddet evttohusaid oktan ákkastallamiin lea 15.3.
